महा पोलीस न्यूज । चेतन वाणी । धरणगाव तालुक्यातील पाळधी या रेल्वे स्थानकाजवळ रिल्स तयार करण्याच्या नादात दोन तरुणांना आपला जीव गमावावा लागला आहे. दुर्दैवी घटना रविवार दि.२६ ऑक्टोबर रोजी सकाळच्या सुमारास पाळधी-चांदसर रेल्वे गेटजवळ घडली आहे. धावत्या रेल्वेसमोर धोकादायक पद्धतीने रील शूट करत असताना अहमदाबाद-हावडा एक्स्प्रेसने धडक दिल्याने या दोन तरुणांचा जागीच मृत्यू झाला. दरम्यान, घटनास्थळी जिल्हा परिषद सदस्य प्रतापराव गुलाबराव पाटील यांनी भेट दिली असून तरुणांना आवाहन देखील केले आहे.
मिळालेल्या माहितीनुसार, पाळधी गावातील येथील महात्मा फुले नगर, प्लॉट भाग (रेल्वे गेट जवळी) येथील रहिवासी असलेले प्रशांत पवन खैरनार (वय १८ वर्षे) आणि हर्षवर्धन महेंद्र नन्नवरे (वय १८ वर्षे) हे दोघे रविवारी सकाळच्या सुमारास पाळधी चांदसर रेल्वे गेटजवळ रेल्वे ट्रॅकवर रील्स तयार करत होते.
धरणगावकडून जळगावकडे जाणाऱ्या अहमदाबाद-हावडा एक्स्प्रेस गाडीची त्यांना जोरदार धडक बसली. हा अपघात इतका भीषण होता की दोन्ही तरुणांचा जागीच मृत्यू झाला. घटनेची माहिती मिळताच पाळधी पोलीस तातडीने घटनास्थळी दाखल झाले. या घटनेमुळे पाळधी परिसरात मोठी हळहळ व्यक्त होत आहे.
घटनेनंतर जिल्हा परिषद सदस्य प्रतापराव पाटील यांनी घटनास्थळी धाव घेत पाहणी केली. तसेच प्रशासनाशी चर्चा केली. प्रसंगी त्यांनी सोशल मीडियाद्वारे पोस्ट करीत तरुणाईला आवाहन देखील केले आहे.
प्रताप पाटील यांनी सोशल मिडियाद्वारे केले आवाहन
पाळधी-चांदसर रेल्वे गेटजवळ रील बनवण्याच्या नादात हर्षल ननवरे आणि प्रशांत खैरनार या दोन तरुण मुलांचा अहमदाबाद एक्सप्रेसखाली आल्याने दुर्दैवी मृत्यू झाला. घटनेची माहिती कळताच मी तातडीने घटना स्थळ गाठले. ऐन उमेदीच्या वयात आपल्या भागातील दोन मुलांचा असा दुर्दैवी अंत होणे, ही बाब एक लोकप्रतिनिधी म्हणून माझ्यासाठी अत्यंत वेदनादायी आहे.
मी ननवरे आणि खैरनार कुटुंबाच्या दुःखात मनापासून सहभागी आहे. ईश्वर मृतांच्या आत्म्यास शांती देवो आणि या कुटुंबांना हा आघात सहन करण्याची शक्ती देवो, हीच प्रार्थना.
या दुःखद घटनेच्या निमित्ताने, मी माझ्या सर्व तरुण मित्रांना आणि त्यांच्या पालकांना कळकळीची विनंती करू इच्छितो की, सोशल मीडियावरील रील बनवण्याचा मोह जीवापेक्षा मोठा नाही. प्रसिद्धी मिळवण्यासाठी कृपया असे जीवघेणे धाडस करू नका. आपल्या जीवाची आणि आपल्या कुटुंबाची काळजी घ्या.
भावपूर्ण श्रद्धांजली! ओम शांती.
