जळगाव जिल्हा वकील संघ निवडणुकीत अॅड. सागर चित्रे यांचा दणदणीत विजय
उपाध्यक्षपदी अॅड. स्मिता झाल्टे, सचिवपदी अॅड. विरेंद्र पाटील,
जळगाव – जळगाव जिल्हा वकील संघाच्या नुकत्याच झालेल्या निवडणुकीत अॅड. सागर चित्रे यांनी अध्यक्षपदाच्या शर्यतीत मोठा विजय मिळवला आहे. त्यांनी प्रतिस्पर्धी उमेदवार अॅड. संजय राणे यांचा १०१ मतांच्या फरकाने पराभव केला. चित्रे यांना ४५४ मते मिळाली, तर राणे यांना ३५३ मते मिळाली. या विजयानंतर समर्थकांनी आनंद साजरा केला.
या निवडणुकीत इतर पदांवरही अनेक उमेदवारांनी विजय मिळवला. उपाध्यक्षपदी अॅड. स्मिता झाल्टे, सचिवपदी अॅड. विरेंद्र पाटील, सहसचिवपदी अॅड. लीना म्हस्के आणि कोषाध्यक्षपदी अॅड. प्रवीण चित्ते हे विजयी झाले.
मतदान आणि इतर निवड प्रक्रिया
या निवडणुकीत एकूण १५ जागांसाठी मतदान घेण्यात आले. यासाठी सुरुवातीला ३६ अर्ज दाखल झाले होते. छाननीमध्ये तीन अर्ज रद्द झाले. महिला सदस्यपदाच्या दोन जागांसाठी केवळ दोनच उमेदवार शिल्लक राहिल्याने अॅड. शारदा सोनवणे आणि अॅड. कल्पना शिंदे यांची बिनविरोध निवड झाली.
मंगळवारी (५ ऑगस्ट) सकाळी ८ ते दुपारी ४ या वेळेत मतदान पार पडले. एकूण १,०१० मतदारांपैकी ८८१ मतदारांनी आपला मतदानाचा हक्क बजावला. सायंकाळी साडेचार वाजल्यापासून मतमोजणी सुरू झाली आणि रात्री उशिरापर्यंत चालली.
विजयी उमेदवारांसह त्यांच्या समर्थकांनी मोठा जल्लोष केला. पुष्पहार घालून व पेढे भरवून विजयी उमेदवारांचे कौतुक केले. मुख्य निवडणूक निर्णय अधिकारी म्हणून अॅड. आर.एन. पाटील, सहायक निवडणूक निर्णय अधिकारी अॅड. मंगला पाटील, अॅड. ए.आर. सरोदे यांनी काम पाहिले.
