‘सयादेव’ फाउंडेशनतर्फे विद्यार्थ्यांना शालेय बॅगांचे वाटप
मूडी करणखेडा (प्रतिनिधी) : सामाजिक बांधिलकी जपत ‘सयादेव’ फाउंडेशनतर्फे मूडी/दरेगाव येथील जिल्हा परिषद प्राथमिक शाळेतील विद्यार्थ्यांना शालेय बॅगांचे मोफत वाटप करण्यात आले. स्व. आप्पासो देवराम सीताराम पाटील (तलाठी आप्पा) व स्व. अनुसयाताई यांच्या स्मृतिप्रीत्यर्थ हा उपक्रम राबविण्यात आला.
ग्रामीण भागातील विद्यार्थ्यांना शिक्षणासाठी प्रोत्साहन मिळावे तसेच त्यांच्या शैक्षणिक गरजा पूर्ण व्हाव्यात, या उद्देशाने या कार्यक्रमाचे आयोजन करण्यात आले होते. शैक्षणिक वर्षाच्या सुरुवातीलाच विद्यार्थ्यांना आवश्यक शालेय साहित्य उपलब्ध करून देण्याच्या हेतूने करण्यात आलेल्या या उपक्रमाचे सर्व स्तरांतून स्वागत करण्यात आले.
यावेळी विद्यार्थ्यांच्या चेहऱ्यावर आनंदाचे भाव दिसून आले. ‘सयादेव’ फाउंडेशनकडून यापूर्वीही विविध सामाजिक व शैक्षणिक उपक्रम राबविण्यात आले असून, ग्रामीण भागातील विद्यार्थ्यांच्या शैक्षणिक प्रगतीसाठी संस्थेचे योगदान उल्लेखनीय ठरत आहे.
कार्यक्रमानंतर शाळेचे मुख्याध्यापक, शिक्षक वृंद आणि विद्यार्थ्यांनी फाउंडेशनचे तसेच श्री. चंद्रशेखर रंगराव पाटील (चंदू दादा) यांचे आभार मानले. या प्रसंगी गावातील प्रतिष्ठित नागरिक, शिक्षक आणि विद्यार्थी मोठ्या संख्येने उपस्थित होते.
उपशीर्षक : स्व. आप्पासो पाटील व स्व. अनुसयाताई यांच्या स्मृतिप्रीत्यर्थ सामाजिक उपक्रम; विद्यार्थ्यांच्या चेहऱ्यावर फुलला आनंद
