महा पोलीस न्यूज । चेतन वाणी । जळगाव एमआयडीसी परिसरातील स्पेक्ट्रम इंडस्ट्रीजमध्ये झालेल्या चोरीचा गुन्हा स्थानिक गुन्हे शाखेने उघडकीस आणला आहे. याप्रकरणी पोलिसांनी तीन आरोपींना अटक केली असून, त्यांच्याकडून चोरीला गेलेल्या सुमारे ४० हजार रुपयांच्या तांब्याच्या पट्ट्या संदर्भात तपास सुरू आहे.
मिळालेल्या माहितीनुसार, १५ ऑगस्ट रोजी रात्रीच्या वेळी स्पेक्ट्रम इंडस्ट्रीजमधून तांब्याच्या पट्ट्यांची चोरी झाली होती. कंपनीचे व्यवस्थापक बाळू गोवर्धन पाटील यांनी दिलेल्या फिर्यादीनुसार, एमआयडीसी पोलीस स्टेशनमध्ये अज्ञात व्यक्तींविरुद्ध गुन्हा दाखल करण्यात आला होता.
स्थानिक गुन्हे शाखेचे वरिष्ठ पोलीस निरीक्षक संदीप पाटील यांना मिळालेल्या गुप्त माहितीनुसार, ही चोरी कंपनीतच काम करणाऱ्या ओम रामेश्वर पोपटकर (वय २०), रोहित उर्फ रोहन भिकन मराठे (वय २२), आणि सागर धर्मेंद्र सपकाळे (वय १९) यांनी केल्याचे निष्पन्न झाले. या माहितीच्या आधारे स्थानिक गुन्हे शाखेच्या पथकाने तिन्ही संशयितांना ताब्यात घेऊन त्यांची कसून चौकशी केली.
चौकशीदरम्यान, त्यांनी गुन्ह्याची कबुली दिली. त्यानंतर त्यांना पुढील कारवाईसाठी एमआयडीसी पोलिसांच्या ताब्यात देण्यात आले. अटक करण्यात आलेल्या आरोपींना न्यायालयाने तीन दिवसांची पोलीस कोठडी सुनावली आहे. या गुन्ह्याचा पुढील तपास पोलीस हवालदार रामकृष्ण पाटील करत आहेत. पोलिसांनी दिलेल्या माहितीनुसार, या आरोपींनी अशाच प्रकारचे आणखी काही गुन्हे केले असण्याची शक्यता आहे.
संपूर्ण कामगिरी पोलीस अधीक्षक डॉ.महेश्वर रेड्डी, अपर पोलीस अधीक्षक अशोक नखाते आणि उपविभागीय पोलीस अधिकारी संदीप गावित यांच्या मार्गदर्शनाखाली वरिष्ठ पोलीस निरीक्षक संदीप पाटील यांच्या नेतृत्वाखालील पोलीस उपनिरीक्षक शरद बागल, सफौ. अतुल वंजारी, पोहेकॉ. विजय पाटील, नितीन बाविस्कर, अक्रम शेख, प्रविण भालेराव, किशोर पाटील, राहुल रगडे, उदय कापडणे, मुरलीधर धनगर, आणि सिद्धेश्वर डापकर यांच्या पथकाने ही यशस्वी कारवाई केली आहे.
