महा पोलीस न्यूज । चेतन वाणी । सण-उत्सवाच्या काळात मालमत्तेविरुद्ध होणारे गंभीर गुन्हे रोखण्यासाठी जळगाव पोलीस अधीक्षक डॉ. महेश्वर रेड्डी यांच्या आदेशानुसार स्थानिक गुन्हे शाखा (L.C.B.) जळगाव आणि भुसावळ बाजारपेठ पोलिसांनी संयुक्तपणे भुसावळ येथील इराणी वस्ती असलेल्या पापानगर येथे अचानक ‘कोंबिंग ऑपरेशन’ राबवले. या कारवाईत अनेक गुन्ह्यांमध्ये फरार असलेल्या दोन सराईत आरोपींना ताब्यात घेण्यात आले आहे.
या विशेष ऑपरेशनमध्ये फरार रेकॉर्डवरील दोन आरोपी त्यांच्या घरी मिळून आले. पोलिसांकडून त्यांची कसून चौकशी करण्यात आली. पोलिसांनी ताब्यात घेतलेला तालीब अली रशीद अली (वय २०, रा. रझा टॉवर, पापानगर, भुसावळ) हा आरोपी एमआयडीसी पो.स्टे. (गु.र.नं. १५१/२०२५) आणि वरणगाव पो.स्टे. (गु.र.नं. ६२/२०२५) येथे दाखल असलेल्या मोटारसायकल चोरीच्या गुन्ह्यांमध्ये फरार होता. त्याला पुढील तपासासाठी एमआयडीसी पोलिसांच्या ताब्यात देण्यात आले आहे.
तसेच मोहम्मद अली लियाकत अली (वय ३५, रा. रझा टॉवर, पापानगर, भुसावळ) हा आरोपी मध्य प्रदेशातील बडवाणी जिल्ह्यातील वारला पो.स्टे. (गु.र.नं. ३५३/२०२४) येथे दाखल असलेल्या फसवणुकीच्या गुन्ह्यात फरार होता. त्याला पुढील तपासासाठी वारला पोलिसांच्या ताब्यात देण्यात आले आहे.
अगोदर देखील गुन्हे दाखल
या आरोपीवर यापूर्वीही उपनगर (नाशिक), जिल्हापेठ (जळगाव), भुसावळ बाजारपेठ आणि उमरेड (नागपूर शहर) यांसारख्या विविध पोलीस ठाण्यांत फसवणूक, हातचलाखी आणि जबरी चोरीसारखे मालमत्तेविरुद्धचे अनेक गंभीर गुन्हे दाखल आहेत.
हे दोन्ही आरोपी गुन्हा केल्यानंतर अनेक दिवसांपासून पोलिसांना गुंगारा देत फरार होते. मात्र, संयुक्त कारवाईत त्यांना पकडण्यात पोलिसांना यश आले आहे.
यशस्वी कारवाई करणारे पथक
जळगाव पोलीस अधीक्षक डॉ.महेश्वर रेड्डी, अपर पोलीस अधीक्षक अशोक नखाते, स्थानिक गुन्हे शाखेचे वरिष्ठ पोलीस निरीक्षक राहुल गायकवाड आणि भुसावळ बाजारपेठचे पोलीस निरीक्षक राहुल वाघ यांच्या मार्गदर्शनाखाली ही कारवाई करण्यात आली. पथकात पोनि नितीन पाटील, पोउपनि. सोपान गोरे, पोउपनि राजु सांगळे, मपोउपनि. भारती काळे, श्रेणी पोउपनि. रवी नरवाडे यांच्यासह स्थानिक गुन्हे शाखा व भुसावळ बाजारपेठ येथील अधिकारी व अंमलदार यांचा सहभाग होता.
