जळगावकरांना वाहतूक कोंडीतून मिळणार मुक्ती!

जळगावकरांना वाहतूक कोंडीतून मिळणार मुक्ती!

महापौरांच्या ‘ड्रीम प्रोजेक्ट’चा मार्ग मोकळा; शिरसोली रस्ता ते एमआयडीसी जोडणाऱ्या १०० फुटी रस्त्यासाठी शेतकऱ्यांची सहमती

जळगाव: जळगाव शहरातील अंतर्गत वाहतुकीचा ताण कायमचा कमी करणाऱ्या आणि भविष्यातील विकासाला नवी दिशा देणाऱ्या अत्यंत महत्त्वाच्या १०० फुती रस्त्याच्या कामातील मोठे अडथळे अखेर दूर झाले आहेत. शिरसोली रस्ता ते एमआयडीसी–छत्रपती संभाजीनगर महामार्गाला जोडणाऱ्या या भव्य रस्त्याच्या विकासाबाबत जळगाव महानगरपालिकेच्या महापौर दीपमाला काळे यांच्या उपस्थितीत मंगळवारी (दि. ९ जून २०२६) संबंधित शेतकरी व जमीन मालकांची एक अत्यंत महत्त्वपूर्ण बैठक पार पडली. या बैठकीत झालेल्या सकारात्मक चर्चेनंतर सर्व जमीन मालकांनी प्रकल्पासाठी जमिनी देण्यास संमती दर्शवली असून, यामुळे शहराच्या दर्जोन्नतीत भर घालणाऱ्या एका मोठ्या विकासकामाला आता कमालीची गती मिळणार आहे.

अजिंठा चौफुली, इच्छादेवी चौकातील कोंडी फुटणार; असा असेल नवा मार्ग

महानगरपालिकेत झालेल्या या हायप्रोफाईल बैठकीस महापौर दीपमाला काळे यांच्यासह नगरसेवक अरविंद देशमुख, नगररचनाकार अमोल पाटील आणि शहर अभियंता आर. टी. पाटील प्रामुख्याने उपस्थित होते. बैठकीदरम्यान महापौरांनी उपस्थित जमीन मालक व शेतकऱ्यांना या प्रकल्पाचे जळगावच्या भविष्यातील महत्त्व पटवून दिले. हा रस्ता पूर्ण झाल्यानंतर एमआयडीसीकडून थेट संभाजीनगर महामार्गाकडे जाणाऱ्या वाहनांना शहरात येण्याची गरज पडणार नाही. यामुळे शहरातील सर्वात व्यस्त आणि कोंडीसाठी कारणीभूत ठरणाऱ्या इच्छादेवी चौक आणि अजिंठा चौफुली परिसरातील वाहतुकीचा ताण प्रचंड प्रमाणावर कमी होणार असून जळगावकरांना मोठा दिलासा मिळणार आहे. भविष्यात हा रस्ता शहरासाठी एक प्रभावी ‘मिनी बायपास’ म्हणून उभा राहणार आहे.

महापौरांचा ‘ड्रीम प्रोजेक्ट’; सायकलिंग अन् जॉगिंग ट्रॅकचे आकर्षण

शहराच्या विस्तारासाठी मैलाचा दगड ठरणाऱ्या या १०० फुटी रस्त्याची रचना जागतिक दर्जाची असणार आहे. हा रस्ता विशेष नियोजनांतर्गत विकसित करण्यात येणार असून, यामध्ये मुख्य वाहतूक रस्त्यासह नागरिकांसाठी स्वतंत्र सायकलिंग ट्रॅक, जॉगिंग ट्रॅक, रस्त्याच्या दुतर्फा सुंदर वृक्षारोपण आणि आकर्षक लँडस्केपिंगचा समावेश असेल. शहराच्या सौंदर्यात आणि आरोग्यात भर घालणारा हा प्रकल्प महापौर दीपमाला काळे यांचा ‘ड्रीम प्रोजेक्ट’ म्हणून ओळखला जात असून, याच्या प्रत्यक्ष कामाकडे आता संपूर्ण जळगावचे लक्ष लागले आहे.

विनामूल्य ऐवजी आता जमीन मालकांना मिळणार टीडीआर (TDR)!

या प्रकल्पातील सर्वात मोठा कायदेशीर आणि आर्थिक पेच जमीन संपादनाचा होता. जळगावच्या मूळ विकास आराखड्यात (डीपी) या रस्त्यासाठी जमीन विनामूल्य ताब्यात घेण्याची जुनी तरतूद होती, ज्याला जमीन मालकांचा विरोध होता. मात्र, यावर उच्च न्यायालयाने (High Court) दिलेल्या महत्त्वपूर्ण आदेशानुसार आता संबंधित जमीन मालकांना त्यांच्या जमिनीच्या मोबदल्यात ‘टीडीआर’ (ट्रान्स्फरेबल डेव्हलपमेंट राईट्स) देण्याचा निर्णय प्रशासनाने घेतला आहे. न्यायालयाच्या या निर्णयानंतर बैठकीत सर्व जमीन मालकांनी या प्रस्तावाचे स्वागत करत, टीडीआर स्वीकारून जमिनीचा ताबा देण्यास स्वेच्छेने सहमती दर्शविली. जमीन मालकांच्या या सकारात्मक भूमिकेबद्दल महापौरांनी सर्वांचे विशेष आभार मानले.

प्रक्रिया सुलभ ठेवून तात्काळ प्रमाणपत्र देण्याची ग्वाही

जमीन देणाऱ्या शेतकरी आणि लाभार्थ्यांना महानगरपालिकेच्या फेऱ्या माराव्या लागू नयेत, यासाठी टीडीआरची संपूर्ण प्रक्रिया अत्यंत सुलभ, पारदर्शक आणि गतिमान पद्धतीने राबविली जाईल, अशी अधिकृत ग्वाही महापौर दीपमाला काळे यांनी दिली. सर्व पात्र लाभार्थ्यांना त्यांचे टीडीआर प्रमाणपत्र कायदेशीर सोपस्कार पूर्ण करून लवकरात लवकर उपलब्ध करून दिले जाईल. त्यामुळे शहराच्या आणि परिसराच्या सर्वांगीण विकासाला गती देण्यासाठी सर्व जमीन मालकांनी आवश्यक कागदपत्रांवर तात्काळ स्वाक्षऱ्या करून प्रशासनाला अंतिम सहकार्य करावे, असे आवाहन शेवटी महापौर आणि उपस्थित अधिकाऱ्यांनी केले आहे.