- महा पोलीस न्यूज | २४ फेब्रुवारी २०२४ | जळगाव तालुक्यातील वावडदा येथे बांधकाम साहित्य चोरी केल्याप्रकरणी एमआयडीसी पोलीस ठाण्यात गुन्हा दाखल करण्यात आला होता. एमआयडीसी पोलिसांनी गुप्त माहिती काढून अवघ्या २४ तासांत दोन संशयित आरोपींना ताब्यात घेतले आहे. संशयितांकडून चोरलेला मुद्देमाल हस्तगत करण्यात आला आहे.
तालुक्यातील वावडदा येथे दि.२० रोजी गावातील मारुती मंदीराचे बांधकाम चालू असलेल्या ठिकाणावरुन कोणीतरी अज्ञात व्यक्तीने सेंट्रींग बांधकामाचे साहीत्य चोरुन नेले होते. याप्रकरणी पोलीस पाटील विनोद तुळशिराम गोपाळ यांनी दिलेल्या फिर्यादीवरुन अज्ञात ईसमाविरुध्द एमआयडीसी पोलीस ठाण्यात गुन्हा दाखल करण्यात आलेला होता.
गुन्हा दाखल झाल्यावर ही चोरी गावातीलच इसमाने केली असल्याची माहीती पोलिसांना मिळाली होती. त्यानुसार पोलिसांनी सापळा रचून संशयित सागर विनोद चव्हाण (वय ३२ वर्ष) व विनोद रमेश गोपाळ (वय २५ वर्ष, दोन्ही रा. वावडदा ता जि जळगाव) यांना ताब्यात घेतले. त्यांनी गुन्ह्याची कबुली दिली असून त्यांचेकडुन गुन्ह्यातील बांधकामाचे साहीत्य जप्त करण्यात आले होते.
कामगिरी उपविभागीय पोलीस अधिकारी संदीप गावीत यांच्या मार्गदर्शनानुसार पोलीस निरीक्षक बबन आव्हाड यांचे मार्गदर्शनाखाली सपोनी आसाराम मनोरे, पोउनी दत्तात्रय पोटे, पोउनी दिपक जगदाळे, सफौ अतुल वंजारी, पोहेका. रामकृष्ण पाटील, प्रदीप पाटील, स्वप्नील पाटील, पोना. सचीन पाटील, योगेश बारी, राहुल रगडे, विशाल कोळी, मनोज पाटील, महीला अंमलदार राजश्री बावीस्कर यांनी केली आहे.
