कंटेनर पलटी झाल्याने चिरडून महाविद्यालयीन तरुण जागीच ठार!
फोनवर बोलण्यासाठी रस्त्याच्या कडेला थांबणे ठरले जीवघेणे; पाळधी बायपासजवळील टहाकळी फाट्यावरील घटना
जळगाव (प्रतिनिधी) – महाविद्यालयात जाण्यासाठी घरातून निघालेल्या एका २० वर्षीय तरुणाचा प्रवास नियतीने अर्ध्यावरच थांबवला. मोबाईलवर आलेल्या फोनवर बोलण्यासाठी रस्त्याच्या कडेला दुचाकी उभी करून थांबलेल्या तरुणाच्या अंगावर भरधाव कंटेनर पलटी झाल्याने त्याचा जागीच दुर्दैवी मृत्यू झाला. धरणगाव तालुक्यातील पाळधी बायपासजवळील टहाकळी फाट्यावर बुधवारी (९ सप्टेंबर) दुपारी सुमारे तीन वाजता हा हृदयद्रावक अपघात घडला. या घटनेने दोनगाव परिसरावर शोककळा पसरली आहे.
किरण जनार्दन सोनवणे (वय २०, रा. दोनगाव, ता. धरणगाव) असे अपघातात मृत्यू झालेल्या तरुणाचे नाव आहे. किरण हा जळगाव येथील महाविद्यालयात शिक्षण घेत होता. नेहमीप्रमाणे तो बुधवारी दुचाकीवरून दोनगाव येथून जळगावकडे महाविद्यालयात जाण्यासाठी निघाला होता.
क्षणभर थांबला अन् काळाने घाला घातला
प्रवासादरम्यान किरणच्या मोबाईलवर फोन आला. त्यामुळे त्याने टहाकळी फाट्याजवळ रस्त्याच्या कडेला दुचाकी थांबवली आणि फोनवर बोलण्यासाठी उभा राहिला. मात्र, पुढच्याच क्षणी काळाने त्याच्यावर घाला घातला. वळण घेत असताना एका भरधाव कंटेनरचा चालकाचा वाहनावरील ताबा सुटला. अनियंत्रित झालेला कंटेनर थेट रस्त्याच्या कडेला उभ्या असलेल्या किरणच्या दुचाकीवर पलटी झाला.
काही क्षणांतच सर्व काही संपले
कंटेनरच्या प्रचंड वजनाखाली किरण दबला. अपघात इतका भीषण होता की त्याला गंभीर दुखापत झाली आणि घटनास्थळीच त्याचा दुर्दैवी मृत्यू झाला. अपघाताची माहिती मिळताच परिसरातील नागरिकांनी घटनास्थळी धाव घेतली. बचावकार्य सुरू करण्यात आले. मात्र, नियतीसमोर सर्व प्रयत्न अपुरे ठरले.
प्रतापराव व विक्रम पाटील यांची घटनास्थळी धाव
घटनेची माहिती मिळताच पाणीपुरवठा व स्वच्छता मंत्री ना. गुलाबराव पाटील यांचे सुपुत्र प्रतापराव पाटील व विक्रम पाटील यांनी तातडीने घटनास्थळी पोहोचून पाहणी केली. त्यांनी स्थानिक नागरिक तसेच प्रशासकीय यंत्रणेच्या मदतीने मदतकार्याला हातभार लावला. पाळधी दूरक्षेत्र पोलिसांनीही तातडीने घटनास्थळी धाव घेत परिस्थिती नियंत्रणात आणली.
रुग्णालयात नेले; मात्र डॉक्टरांनी मृत घोषित केले
किरणला तातडीने जळगाव येथील शासकीय वैद्यकीय महाविद्यालय व रुग्णालयात हलवण्यात आले. मात्र, वैद्यकीय अधिकाऱ्यांनी तपासणी केल्यानंतर त्याला मृत घोषित केले. अवघ्या २०व्या वर्षी किरणचा झालेला हा अकाली मृत्यू कुटुंबीयांसाठी मोठा आघात ठरला आहे.
आई-वडिलांचा आधार हिरावला
किरण हा आई-वडील आणि लहान भावासह दोनगाव येथे राहत होता. शिक्षणाच्या माध्यमातून उज्ज्वल भविष्याची स्वप्ने पाहणाऱ्या किरणचा अशा प्रकारे अचानक मृत्यू झाल्याने सोनवणे कुटुंबावर दुःखाचा डोंगर कोसळला आहे. घरातून महाविद्यालयासाठी निघालेला मुलगा पुन्हा कधीच परतणार नाही, ही कल्पनाच कुटुंबीयांसाठी असह्य ठरत आहे.
पाळधी बायपासच्या सुरक्षेचा प्रश्न ऐरणीवर
पाळधी बायपास परिसरात सातत्याने अपघात होत असल्याने या मार्गाच्या सुरक्षिततेचा प्रश्न पुन्हा एकदा ऐरणीवर आला आहे. वळणांवर आवश्यक त्या सुरक्षा उपाययोजना, वाहतूक नियंत्रण आणि वाहनांच्या वेगावर नियंत्रण ठेवण्याची मागणी स्थानिक नागरिकांकडून होत आहे. या मार्गावर आणखी किती जीव गेल्यानंतर प्रशासन जागे होणार, असा संतप्त सवालही नागरिकांकडून उपस्थित केला जात आहे.
कंटेनर चालकाविरुद्ध कारवाईची प्रक्रिया
या अपघातप्रकरणी पाळधी पोलिसांनी कंटेनर चालकाविरुद्ध गुन्हा दाखल करण्याची प्रक्रिया सुरू केली असून, अपघाताच्या नेमक्या कारणाचा तपास करण्यात येत आहे.
