महा पोलीस न्यूज । चेतन वाणी । यावल तालुक्यातील फैजपूर-अमोदा मार्गावरील मोर नदीच्या पुलाजवळ रविवारी सकाळी एक खाजगी लक्झरी बस गणेश ट्रॅव्हल्स क्रमांक एमपी.३०.९००९ पलटी होऊन भीषण अपघात घडला. ही बस इंदोरहून भुसावळकडे येत असताना सकाळी सुमारे १५ फूट खोल नदीपात्रात कोसळली. या दुर्घटनेत दोन प्रवासी ठार झाल्याची माहिती असून २५ ते ३० प्रवासी गंभीर जखमी झाल्याचे समजते.
मिळालेल्या माहितीनुसार, बस इंदोरहून भुसावळकडे येत असताना हा अपघात घडला आहे. जखमींना तात्काळ फैजपूर येथील खाचणे रुग्णालयात दाखल करण्यात आले, तर काही गंभीर जखमींना पुढील उपचारासाठी भुसावळ येथील रुग्णालयात हलवण्यात आले. अपघातानंतर घटनास्थळी स्थानिक नागरिकांनी त्वरित बचावकार्य सुरू केले, मात्र बसमधील प्रवाशांमध्ये प्रचंड गोंधळ उडाला.
दोन महिन्यात २८ अपघात?
प्राथमिक माहितीनुसार, अपघाताचे कारण चालकाचे नियंत्रण सुटणे किंवा ब्रेक निकामी होणे असावे, असे मानले जात आहे. तरीही, अपघाताच्या नेमक्या कारणांचा तपास सुरू आहे. घटनास्थळी पोलीस, आपत्कालीन सेवा आणि क्रेनच्या साहाय्याने बस हटवण्याचे प्रयत्न सुरू आहेत. विशेष म्हणजे, गेल्या दोन महिन्यांत मोर नदी परिसरात हा २८ वा अपघात आहे.
