महा पोलीस न्यूज | ३० मे २०२४ | भुसावळ शहरातील माजी नगरसेवक संतोष बारसे आणि सामाजिक कार्यकर्ते सुनील राखुंडे यांची बुधवारी रात्री गोळ्या घालून हत्त्या करण्यात आली होती. गुरुवारी याप्रकरणी माजी नगरसेवकसह ८ जणांविरुद्ध गुन्हा दाखल करण्यात आला आहे. दरम्यान, राजू सूर्यवंशी आणि विनोद चावरिया यांना पोलिसांनी ताब्यात घेतल्याचे समजते.
भुसावळ शहरातील जुना सातारा परिसरात असलेल्या मरीमाता मंदिराजवळ दीपक धांडे यांच्या कार्यालयाजवळ बुधवारी रात्री ९.३० वाजेच्या सुमारास चारचाकीने जात असलेल्या माजी नगरसेवक संतोष बारसे आणि सामाजिक कार्यकर्ते सुनील राखुंडे यांच्यावर अज्ञात हल्लेखोरांनी गोळीबार करीत हल्ला केला होता. पूर्ववैमनस्यातून झालेल्या हल्ल्यात दोघांचा जागीच मृत्यू झाला होता.
गुरुवारी सकाळी मिथुन बारसे यांनी दिलेल्या फिर्यादीनुसार माजी नगरसेवक राजू सुर्यवंशीसह शिव पथरोड, विष्णू पथरोड, विनोद चावरिया, सोनू पंडीत, टकरन पथरोड, नितीन पथरोड, बंटी पथरोड यांच्यासह २-३ अनोळखी इसमविरुद्ध भुसावळ शहर पोलीस ठाण्यात गुन्हा दाखल करण्यात आला आहे. घटनास्थळी पोलीस अधीक्षक डॉ.महेश्वर रेड्डी, अपर पोलीस अधीक्षक अशोक नखाते यांच्यासह वरिष्ठ पोलीस अधिकाऱ्यांनी भेट दिली होती.
घडलेल्या घटनेनंतर दोघांचे मृतदेह जळगाव जिल्हा रुग्णालयात आणण्यात आले होते. संपूर्ण जिल्हा पोलीस प्रशासन संशयितांच्या शोध घेत होते. दरम्यान, संशयीत आरोपी राजू सूर्यवंशी हा चारचाकी वाहनाने गुजरात जात असताना त्याला साक्री जि.धुळे येथे एका हॉटेलवरून पोलिसांनी ताब्यात घेतले आहे. तसेच विनोद चावरिया याला देखील ताब्यात घेण्यात आल्याचे समजते.
मयत माजी नगरसेवक संतोष बारसे आणि सुनील राखुंडे यांच्या मृतदेहाचे शवविच्छेदन केल्यानंतर दुपारी ५.३० वाजेच्या सुमारास मृतदेह भुसावळ येथे घेऊन जाण्यात आला.
