अमळनेर PTA ची ‘विद्यार्थी दत्तक मोहीम’ १५ वर्षांपासून कार्यरत; शासन दरबारी दखल घेण्याची मागणी
अमळनेर | पंकज शेटे – तालुक्यातील गरजू आणि होतकरू विद्यार्थ्यांच्या शैक्षणिक भवितव्यासाठी गेल्या १५ वर्षांपासून अविरतपणे कार्यरत असलेल्या अमळनेर PTA क्लासेस संघटनेने आपल्या ‘विद्यार्थी शैक्षणिक दत्तक मोहिमे’ची शासन दरबारी अधिकृत नोंद घेऊन कामाची प्रशंसा करावी, अशी मागणी केली आहे. या मागणीसाठी मगर सर यांनी मा. प्रांताधिकारी यांना निवेदन सादर केले.
‘विद्यार्थी शैक्षणिक दत्तक मोहीम’
अमळनेर PTA क्लासेसची ही मोहीम गेल्या १५ वर्षांपासून समाजातील आर्थिकदृष्ट्या दुर्बल घटकांतील विद्यार्थ्यांसाठी वरदान ठरली आहे. या मोहिमेअंतर्गत गरजू विद्यार्थ्यांना केवळ विनामूल्य शिकवणीच दिली जात नाही, तर त्यांना पुस्तके, वह्या आणि इतर शैक्षणिक साहित्य देखील पुरवले जाते. संघटनेच्या म्हणण्यानुसार, ही केवळ आर्थिक मदत नसून, मानवी संवेदनांची एक अभिव्यक्ती आहे. अनेक अनाथ विद्यार्थ्यांच्या शिक्षणाची जबाबदारी घेऊन त्यांचा शैक्षणिक प्रवास अखंडित ठेवण्यासाठी संस्थेचे शिक्षक सातत्याने प्रयत्न करत आहेत.
शासकीय नोंदणीची अपेक्षा
संस्थेच्या पदाधिकाऱ्यांनी दिलेल्या निवेदनात म्हटले आहे की, त्यांच्या या कार्याची शासनाने दखल घेऊन अधिकृत नोंद घेतल्यास आणि कामाची प्रशंसा केल्यास त्यांना आणखी प्रेरणा मिळेल. या प्रेरणेतून भविष्यात समाजासाठी अधिक मोठे आणि प्रभावी कार्य करण्याची त्यांची तयारी आहे. अमळनेर PTA च्या या उल्लेखनीय कार्याची शासनाने दखल घ्यावी, अशी नम्र अपेक्षा संस्थेने व्यक्त केली आहे.
