अमळनेरमध्ये रंगणार ‘गरबा नाईट २०२६’; अभिनेत्री राणी कुमावत यांची विशेष उपस्थिती
नवदुर्गा स्त्री शक्ती पुरस्कार सोहळ्यात कर्तृत्ववान महिलांचा गौरव; १८ ते २० ऑक्टोबरदरम्यान गरबा-दांडिया स्पर्धांची रंगत
अमळनेरमध्ये रंगणार ‘गरबा नाईट २०२६’; अभिनेत्री राणी कुमावत यांची विशेष उपस्थिती
नवदुर्गा स्त्री शक्ती पुरस्कार सोहळ्यात कर्तृत्ववान महिलांचा गौरव; १८ ते २० ऑक्टोबरदरम्यान गरबा-दांडिया स्पर्धांची रंगत
अमळनेर, प्रतिनिधी : नवरात्रोत्सवाचे औचित्य साधून जीत स्टुडिओ अॅण्ड इव्हेंट मॅनेजमेंटतर्फे अमळनेर येथे ‘गरबा नाईट २०२६’ आणि ‘नवदुर्गा स्त्री शक्ती पुरस्कार सोहळ्या’चे आयोजन करण्यात आले आहे. १८ ते २० ऑक्टोबरदरम्यान छत्रपती शिवाजी महाराज नाट्यगृह येथे हा उत्सव रंगणार असून, खान्देशी अभिनेत्री राणी कुमावत यांची विशेष उपस्थिती हे या कार्यक्रमाचे आकर्षण ठरणार आहे. गरबा-दांडियाच्या जल्लोषासोबतच समाजातील कर्तृत्ववान महिलांचा सन्मान या सोहळ्यात केला जाणार आहे.
नवरात्रोत्सव हा शक्ती, संस्कृती आणि नारीशक्तीच्या गौरवाचा उत्सव मानला जातो. याच भावनेतून विविध क्षेत्रांत आपल्या कार्याचा ठसा उमटविणाऱ्या महिलांचा ‘नवदुर्गा स्त्री शक्ती पुरस्कार’ देऊन गौरव करण्यात येणार आहे. विशेषतः शेतीमध्ये अहोरात्र कष्ट करून कुटुंबाच्या आणि समाजाच्या प्रगतीत मोलाचे योगदान देणाऱ्या कर्तृत्ववान शेतकरी महिलांचा विशेष सत्कार केला जाणार आहे. याशिवाय सामाजिक, शैक्षणिक, आरोग्य आणि अन्य क्षेत्रांत उल्लेखनीय कामगिरी करणाऱ्या महिलांचाही सन्मान करण्यात येणार आहे.
गरबा-दांडिया स्पर्धांसाठी वयोगटानुसार नियोजन
या उत्सवात गरबा आणि दांडिया स्पर्धांची विशेष रंगत अनुभवायला मिळणार आहे. लहान मुलांपासून ज्येष्ठांपर्यंत सर्वांना सहभागी होता यावे, यासाठी वयोगटानुसार स्पर्धांचे आयोजन करण्यात आले आहे. १८ ऑक्टोबर रोजी ४ ते ११ वर्षे आणि १२ ते २० वर्षे वयोगटातील स्पर्धकांसाठी स्पर्धा होणार आहेत. तर १९ ऑक्टोबर रोजी २१ ते ३० वर्षे आणि ३१ वर्षांवरील स्पर्धकांसाठी गरबा-दांडिया स्पर्धा रंगणार आहेत. त्यामुळे अमळनेरकरांना पारंपरिक वेशभूषा, संगीत आणि नृत्याच्या तालावर थिरकण्याची संधी मिळणार आहे.
अभिनेत्री राणी कुमावत यांची उपस्थिती आकर्षण
खान्देशी अभिनेत्री राणी कुमावत यांनी अमळनेरकरांना या कार्यक्रमात सहभागी होण्याचे आवाहन केले आहे. नारीशक्तीचा सन्मान, स्थानिक संस्कृतीचे जतन आणि कलागुणांना व्यासपीठ उपलब्ध करून देण्याच्या उद्देशाने हा उपक्रम आयोजित करण्यात आला आहे. महिलांच्या कर्तृत्वाचा गौरव आणि गरबा-दांडियाचा उत्साह यांचा संगम या कार्यक्रमातून अनुभवायला मिळणार आहे.
१८ ते २० ऑक्टोबरदरम्यान छत्रपती शिवाजी महाराज नाट्यगृह, अमळनेर येथे होणाऱ्या या सोहळ्यात नागरिकांनी कुटुंबीय आणि मित्रपरिवारासह मोठ्या संख्येने सहभागी व्हावे, असे आवाहन आयोजक जीत स्टुडिओ अॅण्ड इव्हेंट मॅनेजमेंटतर्फे करण्यात आले आहे.
संपर्क : जीत संदानशिव – ९३७००२५२२०
