नऊ गंभीर गुन्ह्यांतील सराईत ‘टिचुकल्या’ एमपीडीएखाली नागपूर कारागृहात स्थानबद्ध
जळगाव (प्रतिनिधी ): शहरातील जिल्हापेठ पोलिस ठाण्याच्या हद्दीत गंभीर स्वरूपाचे नऊ गुन्हे दाखल असलेल्या सराईत गुन्हेगारावर अखेर महाराष्ट्र प्रतिबंधात्मक धोका अधिनियम (MPDA) अंतर्गत कारवाई करण्यात आली आहे. सचिन उर्फ टिचुकल्या कैलास चौधरी (वय २६, रा. गणेशवाडी) याला नागपूर कारागृहात स्थानबद्ध करण्यात आले असून, जिल्हाधिकारी आयुष प्रसाद यांनी ३० जून रोजी याबाबतचे आदेश जारी केले.
सचिन चौधरी याच्यावर खून, प्राणघातक हल्ला, जीव घेण्याचा प्रयत्न, दंगल घडविणे, गंभीर दुखापत करणे, बेकायदेशीर शस्त्र बाळगणे आदी गंभीर स्वरूपाचे एकूण नऊ गुन्हे दाखल आहेत. तो पोलिसांच्या रेकॉर्डवरील सराईत गुन्हेगार असून, यापूर्वी त्याच्यावर दोन वेळा प्रतिबंधात्मक कारवाई करण्यात आली होती. मात्र, त्याच्या वर्तनात सुधारणा न झाल्याने MPDA अंतर्गत कठोर कारवाई करण्यात आली आहे.
यासंदर्भातील प्रस्ताव जिल्हापेठ पोलीस ठाण्याचे निरीक्षक राकेश मताफर यांनी सादर केला होता. त्या अनुषंगाने जिल्हा पोलिस प्रशासनाच्या शिफारशीवरून कारवाई करण्यात आली. या कारवाईसाठी पोलीस निरीक्षक संदीप गटील, पोहेकॉ सुनील मोरे, जयंत चौधरी, रफिक शेख, विकार करवानी, सोनवणे यांच्या पथकाने टिचुकल्याला नागपूर कारागृहात रवाना केले.
