Other

कार्तिक पौर्णिमेनिमित्त अयप्पा स्वामी मंदिरात उत्सवाची तयारी

कार्तिक पौर्णिमेनिमित्त अयप्पा स्वामी मंदिरात उत्सवाची तयारी

२४ नोव्हेंबरला पौर्णिमा आणि कृत्तिका नक्षत्राचा शुभयोग; पूजा-अभिषेकांसह मंदिरात विशेष सजावट

जळगाव : निवृत्तीनगर येथील केरळी महिला ट्रस्टच्या अयप्पा स्वामी मंदिरात सोमवार, २३ नोव्हेंबरपासून कार्तिक पौर्णिमा उत्सवाला प्रारंभ होणार आहे. मंगळवार, २४ नोव्हेंबर रोजी पौर्णिमा आणि कृत्तिका नक्षत्राचा शुभयोग जुळून येत असल्याने मंदिरात विविध धार्मिक विधी, पूजा-अभिषेक आणि आकर्षक सजावटीची तयारी सुरू आहे.

यंदा पौर्णिमा तिथी २३ नोव्हेंबर रोजी रात्री ११.३० वाजता सुरू होऊन २४ नोव्हेंबर रोजी रात्री ९.४५ वाजेपर्यंत राहणार आहे. कृत्तिका नक्षत्रयुक्त पौर्णिमेचा शुभमुहूर्त २४ नोव्हेंबर रोजी पहाटे २.०७ ते रात्री ९.४५ वाजेपर्यंत असल्याचे सांगण्यात आले आहे. त्यानंतर रात्री ९.४५ वाजता कार्तिक नक्षत्राला प्रारंभ होऊन ते रात्री १२.३० वाजेपर्यंत राहणार आहे. केरळमधील गुरुजींच्या मार्गदर्शनाखाली उत्सवाचा मुहूर्त निश्चित करण्यात आला आहे.

उत्तर महाराष्ट्रातील वैशिष्ट्यपूर्ण अयप्पा स्वामी मंदिर

निवृत्तीनगर येथील हे उत्तर महाराष्ट्रातील एकमेव अयप्पा स्वामी मंदिर असल्याचे ट्रस्टतर्फे सांगण्यात आले. जानेवारी २००० मध्ये तामिळनाडू येथील गुरुजींच्या हस्ते मंदिरातील मूर्तींची प्राणप्रतिष्ठा शास्त्रोक्त पद्धतीने करण्यात आली होती. मंदिरात महाबलीपुरम येथून आणलेली कार्तिकस्वामींची मूर्ती, कोट्टायम तंथनमची प्रतिकृती, मदुराई मीनाक्षी देवी आणि गुरुवायूर श्रीविष्णू यांच्या मूर्ती विराजमान आहेत.

तीन प्रकारचे अभिषेक हे उत्सवाचे वैशिष्ट्य

कार्तिक पौर्णिमेनिमित्त मंदिरात धन, सोने आणि चांदी अशा तीन प्रकारचे अभिषेक केले जातात. यासाठी भाविकांकडून चिल्लर नाणी संकलित केली जातात. चेन्नईहून विशेषतः मागविण्यात आलेल्या १०८ नाण्यांच्या माध्यमातून सोने आणि चांदीचा अभिषेक केला जातो. या काळात अयप्पा स्वामींचे दर्शन घेणे शुभ मानले जात असल्याने दरवर्षी हजारो भाविक नवसपूर्तीसाठी मंदिरात येतात. उत्सवकाळात शहरातील मान्यवरांच्या हस्ते विविध पूजा आणि अभिषेक विधी पार पडणार आहेत.

गेल्या २५ वर्षांपासून केरळी परंपरेनुसार कार्तिक पौर्णिमेला मंदिराची विशेष सजावट करून ते भाविकांसाठी खुले ठेवले जाते. जागृत देवस्थान म्हणून ओळखल्या जाणाऱ्या या मंदिर परिसरात नवग्रहांसह अन्य देवतांची मंदिरेही आहेत. ही मंदिरे वर्षभर भाविकांच्या दर्शनासाठी खुली असतात.

यंदाच्या उत्सवासाठी मंदिर परिसरात आकर्षक सजावट, रोषणाई, मंडप उभारणी आणि धार्मिक विधींची तयारी अंतिम टप्प्यात आली आहे. भाविकांनी मोठ्या संख्येने उपस्थित राहून अयप्पा स्वामींचे दर्शन घ्यावे आणि उत्सवाचा लाभ घ्यावा, असे आवाहन केरळी महिला ट्रस्टतर्फे करण्यात आले आहे. अधिक माहितीसाठी ट्रस्टच्या संस्थापक अध्यक्ष वासंती अय्यर यांच्याशी ९४०५१४३२३५ या क्रमांकावर संपर्क साधावा.

 

Chetan Wani

पत्रकारिता क्षेत्रात गत १६ वर्षांपासून कार्यरत. शोध पत्रकारिता, क्राईम रिपोर्टींगचा १५ वर्षांचा प्रदीर्घ अनुभव. राजकारण, प्रशासन, क्रीडा, संस्कृती, उद्योग जगतातील विशेष लेखन. विविध दैनिक, मंत्रालय, माहिती व जनसंपर्क विभागातील पत्रकारितेचा अनुभव. लोकसभा, विधानसभा, मनपा निवडणूक काळात मीडिया मॅनेजमेंट. सोशल मीडिया मॅनेजमेंट, इमेज बिल्डिंग, मार्केटिंग, ब्रॅण्डिंग यासारख्या विविध क्षेत्राचा प्रदीर्घ अनुभव. संपर्क : 9823333119

Related Articles

Leave a Reply

Your email address will not be published. Required fields are marked *

Back to top button