ब्रेकिंग : तांबापुरात किरकोळ वादातून दगडफेक; चार जण जखमी

महा पोलीस न्यूज । चेतन वाणी । शहरातील मेहरुण परिसरात असलेल्या बगीचामध्ये आज दुपारी क्रिकेट खेळण्याच्या किरकोळ कारणावरून दोन गटांमध्ये वाद झाला. हा वाद काही मिनिटांतच वाढल्याने गवळीवाडा, टिपू सुलतान चौक आणि तांबापुरा परिसरात दगडफेक झाली. या अचानक घडलेल्या घटनेमुळे परिसरात काही काळ तणावाचे वातावरण निर्माण झाले होते.

घटनेची माहिती मिळताच एमआयडीसी पोलीस ठाण्याचे अधिकारी आणि कर्मचारी तातडीने घटनास्थळी दाखल झाले. त्यांनी जमाव पांगवण्याचा प्रयत्न करून परिस्थिती नियंत्रणात आणण्याचे प्रयत्न सुरू केले. काही काळातच पोलीस अधीक्षक डॉ. महेश्वर रेड्डी, तसेच अतिरिक्त पोलीस दल व आरसीपी पथक घटनास्थळी दाखल झाले व परिस्थितीवर नियंत्रण मिळवण्यात आले.

चार जण जखमी आणि नुकसान
घटनेत दगडफेकीमुळे काही घरांचे किरकोळ नुकसान झाल्याची माहिती असून, चार जण जखमी झाल्याचे समजते. जखमींवर खाजगी आणि स्थानिक रुग्णालयात उपचार सुरू आहेत. घटनेत कोणतीही गंभीर हानी झाल्याची माहिती नाही.

अफवा पसरवणाऱ्यांवर कारवाईचा इशारा
या घटनेनंतर पोलिसांनी नागरिकांना शांतता व संयम पाळण्याचे आवाहन केले असून, सोशल मीडिया किंवा इतर माध्यमांतून जातीय सलोखा बिघडविणारे मेसेज किंवा अफवा पसरवू नयेत, असे स्पष्टपणे सांगितले आहे. “परिस्थिती पूर्णपणे नियंत्रणात असून कोणीही अफवांवर विश्वास ठेवू नये,” असे आवाहन पोलिसांनी केले आहे.

दंगेखोरांच्या अटकेसाठी पोलीस रवाना
या दगडफेकीदरम्यान काही दंगेखोर मोबाईल व्हिडिओ आणि सीसीटीव्ही फुटेजमध्ये कैद झाल्याचे समोर आले आहे. पोलिसांकडून या फुटेजच्या आधारे आरोपींची ओळख पटविण्याचे तसेच त्यांच्या अटकेची कारवाई करण्याचे काम सुरू आहे.

पहा संपूर्ण व्हिडिओ :