चाळीसगावात अवैध गुटख्याची वाहतूक करणारा टेम्पो पकडला ; ६ लाख ८३ हजार २४४ रुपयांचा मुद्देमाल जप्त
चाळीसगावात अवैध गुटख्याची वाहतूक करणारा टेम्पो पकडला ; ६ लाख ८३ हजार २४४ रुपयांचा मुद्देमाल जप्त
चाळीसगाव: शासनाने प्रतिबंधित केलेल्या सुगंधित पान मसाला आणि इतर पदार्थांची अवैधरित्या वाहतूक करणाऱ्या एका टेम्पोवर चाळीसगाव शहर पोलिसांनी मोठी कारवाई केली आहे. पोलिसांनी ही कारवाई नागद रोडवरील अवि रेखा पेट्रोल पंपाजवळ केली असून, या कारवाईत ६ लाख ८३ हजार २४४ रुपयांचा मुद्देमाल जप्त करण्यात आला आहे.
चाळीसगाव शहर पोलिसांना मिळालेल्या गुप्त माहितीनुसार, त्यांनी नागद रोडवरील अवि रेखा पेट्रोल पंपासमोर संशयित टेम्पो (क्र. एमएच १९ सीवाय ६६५२) थांबवला. टेम्पोची तपासणी केली असता, त्यात शासनाने प्रतिबंधित केलेला ‘सुगंधित पान मसाला’, ‘कुरकुरे’ आणि ‘पोंगा पंडित’ यांसारखा अन्नपदार्थांचा साठा आढळून आला. पोलिसांनी तात्काळ टेम्पोसह हा सर्व मुद्देमाल जप्त केला.
जप्त केलेल्या मालाचा पंचनामा अन्न व औषध प्रशासन, जळगाव विभागाचे अधिकारी शरद मधुकर पवार आणि श्रेणी कैलास पाटील यांच्या उपस्थितीत करण्यात आला.
या प्रकरणी चाळीसगाव शहर पोलीस ठाण्यात गुन्हा दाखल करण्यात आला असून, पुढील तपास सुरू आहे. पोलीस अधीक्षक महेश्वर रेड्डी, अपर पोलीस अधीक्षक कविता नेरकर आणि उपविभागीय पोलीस अधिकारी ठाकुरवाड यांच्या मार्गदर्शनाखाली पोलीस निरीक्षक अमितकुमार मनेळ यांच्या पथकाने ही कारवाई केली. या पथकात पोलीस उपनिरीक्षक संदीप घुले, तसेच अन्य पोलीस कर्मचारी सहभागी होते. गुन्ह्याचा पुढील तपास सहायक पोलीस निरीक्षक भारत चौधरी करत आहेत.
