एमआयडीसी पोलिसांनी, गाडीत लिफ्ट देण्याच्या बहाण्याने चोरी करणाऱ्यांना पकडले

जळगाव – एमआयडीसी पोलिसांनी एका तरुणाला चारचाकी गाडीत लिफ्ट देण्याच्या बहाण्याने लुटणाऱ्या दोन चोरांना अटक केली आहे. पोलिसांनी त्यांच्याकडून २२,५०० रुपये रोख, एक मोबाईल फोन आणि गुन्ह्यात वापरलेली मारुती अर्टिगा कारही जप्त केली आहे.

घटनेनुसार, २५ ऑगस्ट २०२५ रोजी दुपारी १२.३० वाजता एक तरुण धुळे येथे जाण्यासाठी अजिंठा चौकातील बस स्टॉपवर बसची वाट पाहत होता. त्याच वेळी, एका चारचाकी गाडीतील दोघांनी त्याला लिफ्ट देण्याचे आश्वासन दिले. गाडीत इतर प्रवासी असल्याचा बहाणा करत त्यांनी त्या तरुणाला पुढील सीटवर बसवले. काही अंतर गेल्यावर गाडीत जागा नसल्याचे कारण देत त्यांनी त्याला खाली उतरवले. गाडीतून उतरल्यावर तरुणाला त्याच्या खिशातला मोबाईल फोन आणि २२,५०० रुपये रोख रक्कम चोरीला गेल्याचे लक्षात आले. त्यानंतर त्याने तात्काळ एमआयडीसी पोलीस ठाण्यात तक्रार दाखल केली.

या घटनेची गंभीर दखल घेत एमआयडीसी पोलीस ठाण्याचे पोलीस निरीक्षक श्री बबन आव्हाड यांनी तात्काळ गुन्हे शोध पथकाला तपास करण्याचे आदेश दिले. पथकाने घटनास्थळावरील सीसीटीव्ही फुटेज तपासले आणि गोपनीय माहितीच्या आधारे आरोपींचा शोध सुरू केला.

पोलिसांनी नशिराबाद येथील बाजार परिसरात सापळा रचून आरोपी वसीम अजमल खान (वय ३५) आणि जाफर उल्ला कहुल्ला कासार (वय ४२) यांना ताब्यात घेतले. चौकशीदरम्यान, त्यांनी चोरीची कबुली दिली आणि त्यांचे इतर दोन साथीदारही असल्याचे सांगितले. पोलिसांनी त्यांच्याकडून चोरीचा सर्व मुद्देमाल आणि गुन्ह्यात वापरलेली सुमारे ५ लाख रुपये किमतीची मारुती अर्टिगा कार जप्त केली.

अटक करण्यात आलेल्या आरोपींना न्यायालयात हजर केले असता, न्यायालयाने त्यांना दोन दिवसांची पोलीस कोठडी सुनावली आहे. या आरोपींवर यापूर्वीही विविध पोलीस ठाण्यांमध्ये गुन्हे दाखल असल्याची माहिती आहे. या प्रकरणाचा पुढील तपास पोलीस नाईक प्रदीप चौधरी करत आहेत.

सदरची कारवाई पोलीस अधीक्षक श्री महेश्वर रेड्डी, अप्पर पोलीस अधीक्षक श्री अशोक नखाते आणि पोलीस उप अधीक्षक श्री नितीन गणापुरे यांच्या मार्गदर्शनाखाली करण्यात आली.