जळगावः प्रवचनासाठी घर बंद करून बाहेर गेलेल्या वृद्ध महिलेच्या घरातून सोने आणि चांदी चे दागिने व रोकड लांबविणाऱ्या चोरट्याच्या धुळे येथून पोलिसांनी मुस्क्या आवळल्या आहेत.
साहिल प्रवीण झाल्टे उर्फ साहिल शेख रा. पवन नगर धुळे असे अटक केलेल्या संशयित आरोपीचे नाव आहे.
सूत्रांनी दिलेल्या माहितीनुसार वनिता जगन्नाथ चौधरी ह्या
रामानंदनगर परिसरात वास्तव्याला असून त्या६ ऑक्टोबर रोजी दुपारच्या सुमारास प्रवचनासाठी घर बंद करून गेल्या होत्या. साहिल याने बंद कर फोडून घरातून सोन्या-चांदीचे दागिने आणि रोख रक्कम असा मुद्देमाल चोरून नेला होता. याबाबत रामानंदनगर पोलीस ठाण्यात गुन्हा दाखल करण्यात आला होता. दरम्यान या गुन्ह्याच्या शोध घेत असताना संशयित आरोपी हा धुळे येथील पवन नगरातील रहिवाशी असल्याची गोपनिय माहिती स्थानिक गुन्हे शाखेच्या पथकाला मिळाली. त्यानुसार स्थानिक गुन्हे शाखेचे वरिष्ठ पोलीस निरीक्षक बबन आव्हाड यांनी सूचना देऊन पथकातील पोलीस उपनिरीक्षक दत्तात्रय पोटे, सहायक फौजदार रवी नरवाडे, विजयसिंह पाटील, संजय हिवस्कर, अतुल वंजारी, पोलीस कॉन्स्टेबल विजय पाटील, हिरालाल पाटील, राजेंद्र मेवे, पो. कॉ. प्रदीप चौरे, अक्रम शेख, ईश्वर पाटील यांनी दोन दिवस धुळे येथे थांबून संशयित आरोपी साहिल प्रवीण झाल्टे उर्फ साहिल शेख याला पवन नगरातून अटक केली. त्याने चोरी केल्याची कबुली दिली आहे. पुढील कारवाईसाठी त्याला रामानंदनगर पोलिसांच्या ताब्यात देण्यात आले आहे. दरम्यान साहिल झाल्टे हा सराईत गुन्हेगार असल्याची माहिती असून त्याच्यावर धुळ्यात विविध गुन्हे दाखल असल्याची माहिती आहे.
