जळगाव : शहरातील खेडी शिवारात असलेल्या शिवनगर परिसरातील शंभु रेसिडेंसीमधील एका फ्लॅटमध्ये झालेल्या घरफोडीचा तपास एमआयडीसी पोलिसांनी लावला आहे. पोलिसांनी या प्रकरणी दोन अट्टल चोरट्यांना अटक करून त्यांच्याकडून सुमारे ४ लाख रुपयांचा मुद्देमाल जप्त केला आहे.
१३ जानेवारी २०२५ रोजी सायंकाळी साडेसहाच्या सुमारास शंभु रेसिडेंसीच्या फ्लॅट क्रमांक ४ मधून अज्ञात चोरट्यांनी सोने-चांदीचे दागिने लंपास केले होते. या प्रकरणी रवींद्र मगरे यांच्या फिर्यादीवरून एमआयडीसी पोलीस ठाण्यात भारतीय न्याय संहिता २०२३ च्या कलम ३०५ (अ), ३३१ (३), ३ (५) नुसार गुन्हा दाखल करण्यात आला होता.
गुन्ह्याचा तपास करण्यासाठी पोलीस निरीक्षक बबन आव्हाड यांनी तात्काळ गुन्हे शोध पथकाची नेमणूक केली. या पथकात पोलीस उपनिरीक्षक राहुल तायडे, सहायक फौजदार विजयसिंग पाटील, पोलीस हेड कॉन्स्टेबल रामकृष्ण पाटील, पोलीस कॉन्स्टेबल निलेश पाटील, विशाल कोळी आणि राहुल रगडे यांचा समावेश होता.
या पथकाने केलेल्या तपासानंतर, पोलिसांनी ३१ जुलै २०२५ रोजी कैलास चिंतामण मोरे आणि जयप्रकाश राजाराम यादव (दोघे रा. सोनगीर, धुळे) या दोन आरोपींना अटक केली. न्यायालयाने त्यांना ७ ऑगस्ट २०२५ पर्यंत पोलीस कोठडी सुनावली होती.
तपासादरम्यान, आरोपी कैलास मोरे याने गुन्ह्याची कबुली दिली. त्याच्या सांगण्यावरून पोलिसांनी सोनगीर येथील त्याच्या घरातून चोरीला गेलेल्या मुद्देमालापैकी ३,८१,५१४ रुपये किमतीची ३८.९३० ग्रॅम सोन्याची लगड आणि १५,६८५ रुपये किमतीचे १३५ ग्रॅम चांदीचे दागिने असा एकूण ३,९७,१९९ रुपयांचा मुद्देमाल जप्त केला.
या गुन्ह्याचा पुढील तपास पोलीस उपनिरीक्षक राहुल तायडे आणि पोलीस कॉन्स्टेबल निलेश पाटील करत आहेत. ही कारवाई पोलीस अधीक्षक महेश्वर रेड्डी, अपर पोलीस अधीक्षक अशोक नखाते आणि पोलीस उपअधीक्षक संदीप गावीत यांच्या मार्गदर्शनाखाली करण्यात आली.
