जिल्हा बँकेच्या निवडणुकीत तालुकानिहाय चुरस; एनटीच्या जागेसाठी अरविंद देशमुख प्रभावी दावेदार
गिरीश महाजन, गुलाबराव पाटील, मंगेश चव्हाण, रक्षा खडसे यांच्यासह दिग्गजांचे अर्ज; १७ नोव्हेंबरपर्यंत माघारीची मुदत
जळगाव, प्रतिनिधी : जळगाव जिल्हा मध्यवर्ती सहकारी बँकेच्या २१ संचालकपदांच्या निवडणुकीसाठी राजकीय हालचालींना वेग आला असून, विविध तालुक्यांत दिग्गजांसह इच्छुक उमेदवारांमध्ये चुरस निर्माण झाली आहे. जामनेरमधून मंत्री गिरीश महाजन, जळगावमधून पालकमंत्री गुलाबराव पाटील, चाळीसगावमधून आमदार मंगेश चव्हाण आणि मुक्ताईनगरमधून केंद्रीय राज्यमंत्री रक्षा खडसे यांच्यासह अनेकांनी उमेदवारी अर्ज दाखल केले आहेत. दरम्यान, विमुक्त जाती व भटक्या जमाती (एनटी) प्रवर्गाच्या जागेसाठी जळगावचे नगरसेवक अरविंद भगवान देशमुख यांची उमेदवारी निश्चित झाल्यास, सहकार क्षेत्रातील अनुभवाच्या जोरावर ते प्रभावी दावेदार ठरू शकतात.
जिल्हा बँकेच्या निवडणुकीत तालुकानिहाय राजकीय समीकरणे जुळविण्याचे प्रयत्न सुरू आहेत. काही मतदारसंघांत अनेक उमेदवारांनी अर्ज दाखल केल्याने चुरस वाढली आहे, तर काही ठिकाणी मोजकेच अर्ज असल्याने अंतिम चित्राकडे लक्ष लागले आहे. अर्जांची छाननी, अपील आणि उमेदवारी माघारीनंतरच प्रत्यक्ष लढतींचे स्वरूप स्पष्ट होणार आहे.
जामनेर, जळगाव आणि चाळीसगावात दिग्गज मैदानात
जामनेर मतदारसंघातून मंत्री गिरीश महाजन आणि तुकाराम विठोबा निकम यांचे अर्ज छाननीनंतर कायम असल्याची माहिती आहे. अर्ज दाखल करण्याच्या टप्प्यात ज्योती नाना पाटील आणि रघुनाथ सखाराम पाटील यांचीही नावे समोर आली होती.
जळगाव मतदारसंघातून पालकमंत्री गुलाबराव पाटील, माजी महापौर जयश्री महाजन, कुलभूषण पाटील आणि प्रभाकर सोनवणे यांचे अर्ज चर्चेत आहेत. चाळीसगावमधून आमदार मंगेश चव्हाण आणि प्रदीप रामराव देशमुख यांच्यासह इतर इच्छुकांनी अर्ज दाखल केले आहेत.
मुक्ताईनगरमध्ये राजकीय पेच कायम
मुक्ताईनगर मतदारसंघात केंद्रीय राज्यमंत्री रक्षा खडसे, देवयानी चंद्रकांत देशमुख, विनोद रामदास तराळ आणि योगेश कोलते यांचे अर्ज दाखल झाल्याची माहिती आहे. या जागेच्या वाटपावरून रक्षा खडसे आणि आमदार चंद्रकांत पाटील यांच्या गटांमध्ये पेच कायम असल्याचे वृत्त आहे. त्यामुळे या मतदारसंघातील अंतिम उमेदवारीकडे राजकीय वर्तुळाचे लक्ष लागले आहे.
धरणगाव, पाचोरा आणि अमळनेरमध्येही चुरस
धरणगाव मतदारसंघातून प्रताप गुलाबराव पाटील, सोनल संजय पवार आणि बँकेचे विद्यमान अध्यक्ष संजय मुरलीधर पवार यांनी अर्ज दाखल केले होते. संजय पवार यांचा अर्ज छाननीत बाद झाल्याचे वृत्त आहे.
पाचोरा मतदारसंघात सुमित किशोर पाटील आणि सतीश परशराम शिंदे यांचे अर्ज चर्चेत आहेत. छाननीत बाद झालेला सुमित पाटील यांचा अर्ज अपिलानंतर वैध ठरल्याने या मतदारसंघातील लढतीला महत्त्व प्राप्त झाले आहे.
भडगावमधून प्रताप हरी पाटील, पूनम प्रशांत पाटील, सोमसिंग खुमानसिंग पाटील आणि प्रकाश अमृत पाटील यांनी अर्ज दाखल केले आहेत. अमळनेरमध्ये जयश्री अनिल पाटील आणि प्रफुल्ल हिरालाल पवार यांचे अर्ज आहेत. आमदार अनिल पाटील यांचा स्वतःचा अर्ज छाननीत बाद झाल्याचे वृत्त आहे.
चोपडा, रावेर आणि यावलमध्ये अनेक इच्छुक
चोपडा मतदारसंघातून मनोज अशोक सनेर, नंदकिशोर भानुदास पाटील, घनश्याम ओंकारलाल अग्रवाल, सुरेश शामराव पाटील, नितीन रामदास पाटील, सुनील दगडू महाजन, रोहित दिलीप निकम आणि नीलम शशिकांत पाटील यांच्यासह अनेकांनी अर्ज दाखल केले आहेत.
रावेरमधून राजेंद्र पंढरीनाथ चौधरी, रमेश नगराज पाटील, गोंडू रामदास महाजन, योगीराज गबाजी पाटील, राजीव रघुनाथ पाटील, नंदकिशोर भागवत महाजन, राजेश गजानन वानखेडे आणि मंदार मनोहर पाटील यांचे अर्ज नोंदविण्यात आले आहेत. यावलमधून रामदास गोंडू पाटील, विनोदकुमार पंडितराव पाटील आणि सागर राजेंद्र महाजन यांच्यासह इतर इच्छुकांनी अर्ज दाखल केले आहेत.
बोदवडमधून मधुकर रामचंद्र राणे, रुपेश दामोदर गांधी आणि गोपाल बाबुराव गंगतीरे यांचे अर्ज आहेत. पारोळा मतदारसंघातून नलिनी चिमणराव पाटील, एरंडोलमधून मृणाल अमोल पाटील आणि भुसावळमधून रजनी संजय सावकारे यांचा एकमेव अर्ज असल्याची माहिती आहे.
एनटीच्या जागेसाठी अरविंद देशमुख यांच्या नावाची चर्चा
जिल्हा बँकेच्या विमुक्त जाती व भटक्या जमाती (एनटी) प्रवर्गातील राखीव जागेसाठी अनेक इच्छुकांनी अर्ज दाखल केले आहेत. विजय रामदास पाटील, सुरेश पुना धनके, सदाशिव गणपतराव ढेकळे, प्रकाश देशमुख जाधव, विशालसिंग कोमलसिंग पाटील, प्रकाश मेहताबसिंग राठोड, सुनील रमेश काळे, विकास ज्ञानेश्वर वाघ, दिलीप उत्तमराव धनगर आणि अविनाश प्रकाश जाधव यांच्यासह इच्छुकांची नावे चर्चेत आहेत.
या पार्श्वभूमीवर पहूर येथील अरविंद भगवान देशमुख यांच्या संभाव्य उमेदवारीकडेही लक्ष लागले आहे. ते जळगाव महानगरपालिकेच्या प्रभाग क्रमांक १५चे नगरसेवक असून, जिल्हा दूध उत्पादक संघाचे संचालक आणि जिल्हा कृषी औद्योगिक सहकारी संस्थेचे उपाध्यक्ष म्हणून त्यांनी काम पाहिले आहे. दुग्ध व्यवसाय, कृषी आणि ग्रामीण सहकार क्षेत्रातील अनुभव तसेच सहकारी संस्थांशी असलेला संपर्क ही त्यांच्या दावेदारीची जमेची बाजू मानली जात आहे.
एनटी प्रवर्गातून त्यांची उमेदवारी निश्चित झाल्यास, सहकार क्षेत्रातील अनुभवाच्या बळावर ते प्रभावी दावेदार ठरू शकतात. मात्र, अंतिम उमेदवारी आणि प्रत्यक्ष लढतीचे चित्र उमेदवारी माघारीनंतरच स्पष्ट होणार आहे.
ओबीसी, महिला आणि इतर राखीव जागांवरही लक्ष
इतर मागासवर्गीय प्रवर्गातून डॉ. सतीश भास्करराव पाटील, रोहन सतीश पाटील, जयश्री सुनील महाजन, राजाराम नागो सोनार, प्रताप हरी पाटील, प्रताप गुलाबराव पाटील, सुनील दामोदर पाटील, पराग वसंतराव मोरे, निलेश सुरेश चौधरी, विष्णू महादू सोनार आणि राजेश दत्तू पाटील यांच्यासह अनेक इच्छुकांचे अर्ज चर्चेत आहेत.
महिला प्रतिनिधींच्या जागांसाठी लिलाबाई सुरेश चौधरी, सारिका गोपाळ भंगाळे, नीलम शशिकांत पाटील, ज्योती रविंद्र पाटील, योगिता अशोक पाटील, पूनम प्रशांत पाटील, ज्योती नाना पाटील, जयश्री सुनील महाजन, इंदिराताई भानुदास पाटील, रेखा सतीश पाटील आणि मनीषा अनंतराव सूर्यवंशी यांचे अर्ज नोंदविण्यात आले आहेत.
अनुसूचित जाती व अनुसूचित जमाती प्रवर्गातून महेंद्र बळीराम सपकाळे, शामकांत बळीराम सोनवणे, चंद्रकांत बळीराम सोनवणे, प्रवीण नाना सुरवाडे, प्रशांत सुकदेव निकम, साहेबराव कौतिक सैंदाणे, अविनाश मुकुंदराव भालेराव आणि अलका जुलाल सूर्यवंशी यांच्यासह इच्छुकांनी अर्ज दाखल केले आहेत.
इतर सहकारी संस्था गटातून विशाल गुलाबराव देवकर, गोपाळ रामकृष्ण भंगाळे, निलेश सुरेश चौधरी, अॅड. वसंतराव शिवदास भोलाणे, सुदाम शेनपडू पाटील, प्रताप हरी पाटील आणि पूनम प्रशांत पाटील यांचे अर्ज चर्चेत आहेत.
१८ नोव्हेंबरला लढतींचे चित्र स्पष्ट होणार
जिल्हा बँकेच्या निवडणुकीत काही इच्छुकांनी एकापेक्षा अधिक मतदारसंघांतून अर्ज दाखल केले आहेत. उमेदवारी अर्ज मागे घेण्याची अंतिम मुदत १७ नोव्हेंबर रोजी दुपारी ३ वाजेपर्यंत आहे. त्यानंतर १८ नोव्हेंबर रोजी अंतिम उमेदवार यादी जाहीर करून चिन्हवाटप करण्यात येणार आहे.
जाहीर निवडणूक कार्यक्रमानुसार २९ नोव्हेंबर रोजी मतदान, तर ३० नोव्हेंबर रोजी मतमोजणी होणार आहे. त्यामुळे उमेदवारी माघारीनंतर कोणत्या मतदारसंघात थेट लढत होणार आणि कुठे राजकीय समीकरणे बदलणार, याचे चित्र स्पष्ट होईल.
