हेडावे रस्त्यावर भीषण अपघात : दाम्पत्य जागीच ठार, एक जण गंभीर जखमी
अमळनेर प्रतिनिधी : अमळनेर शहराजवळील हेडावे रस्त्यावर गुरुवारी (दि. २५ सप्टेंबर) सायंकाळी सातच्या सुमारास झालेल्या भीषण अपघातात दुचाकीवरील दाम्पत्य जागीच ठार झाले असून एक जण गंभीर जखमी झाला आहे. भरधाव आयशर ट्रकने दुचाकीला दिलेल्या जोरदार धडकेत हा प्रकार घडला.
या अपघातात विश्वनाथ हिम्मत भिल व त्यांची पत्नी ज्योतिबाई विश्वनाथ भिल (दोन्ही रा. एकरुखी, ता. अमळनेर) यांचा जागीच मृत्यू झाला. तर बाळू साहेबराव पाटील हा गंभीर जखमी असून त्याला प्रथम अमळनेर ग्रामीण रुग्णालयात हलविण्यात आले. नंतर पुढील उपचारासाठी त्याला धुळे येथील ग्रामीण रुग्णालयात दाखल करण्यात आले आहे.
अपघाताची माहिती मिळताच अमळनेर पोलीस ठाण्याचे निरीक्षक दत्तात्रय निकम यांच्या मार्गदर्शनाखाली पथकाने घटनास्थळी धाव घेऊन पंचनामा केला. मृतदेह ग्रामीण रुग्णालयात हलविण्यात आले असून उशिरापर्यंत गुन्हा दाखल करण्याची प्रक्रिया सुरू होती.
