सणांच्या पार्श्वभूमीवर अमळनेर पोलीस उपविभागाकडून ‘मॉक ड्रिल’ आणि ‘रूट मार्च’
साराबच्या माध्यमातून दिला सलोख्याचा संदेश
अमळनेर:पंकज शेटे I गणेशोत्सव आणि आगामी ईद-ए-मिलाद या सणांच्या पार्श्वभूमीवर अमळनेर पोलीस उपविभागाने गुरुवारी (२८ ऑगस्ट) शहरात ‘दंगा काबू’ मॉक ड्रिल आणि ‘रूट मार्च’चे आयोजन केले होते. या सरावाच्या माध्यमातून पोलिसांनी शहरातील शांतता आणि सुव्यवस्था राखण्याचा निर्धार व्यक्त केला.
आज २८ रोजी सकाळी ९:४५ ते ११:४५ दरम्यान, पोलीस मुख्यालयाच्या कवायत निर्देशकांच्या मार्गदर्शनाखाली डॉ. बाबासाहेब आंबेडकर चौकात दंगा काबू योजनेचा सराव (मॉक ड्रिल) करण्यात आला. यात ढाल, लाठी, गॅसगन, शिल्ड आणि ग्रेनेडचा वापर करून दंगल नियंत्रणात आणण्याचे प्रात्यक्षिक घेण्यात आले. उपविभागीय पोलीस अधिकारी विनायक कोते आणि पोलीस निरीक्षक दत्तात्रय निकम यांच्या उपस्थितीत सर्व अधिकारी व अंमलदारांना मार्गदर्शन करण्यात आले.
मॉक ड्रिलनंतर पोलिसांनी शहराच्या संवेदनशील भागातून ‘रूट मार्च’ काढला. डॉ. बाबासाहेब आंबेडकर चौक, सुभाष चौक, बाजारपेठ, तिरंगा चौक, कुंटे रोड, पवन चौक, जामा मशीद अशा विविध भागांतून हा रूट मार्च फिरला. याद्वारे पोलिसांनी जनतेला शांतता व सलोख्याचा संदेश दिला.
या रूट मार्चमध्ये अमळनेर, मारवड, पारोळा आणि एरंडोल पोलीस स्टेशनचे अधिकारी व अंमलदार, पोलीस मुख्यालयाकडील दंगा नियंत्रण पथक, स्ट्रायकिंग फोर्स आणि ६२ होमगार्ड सहभागी झाले होते. पोलिसांच्या या उपक्रमाला सामान्य जनतेकडून सकारात्मक प्रतिसाद मिळाला.
