जळगावात १३ ऑक्टोबरला जिल्हा परिषद, पंचायत समिती गट-गणांचे आरक्षण जाहीर होणार

जळगावात १३ ऑक्टोबरला जिल्हा परिषद, पंचायत समिती गट-गणांचे आरक्षण जाहीर होणार

दिवाळीनंतर निवडणुकीचा बिगुल वाजण्याची शक्यता

जळगाव (प्रतिनिधी): राज्य निवडणूक आयोगाने ३४ जिल्हा परिषद अध्यक्षपदांचे आरक्षण जाहीर केल्यानंतर आता पंचायत समिती सभापती आणि गट-गणांच्या आरक्षण सोडतीचा कार्यक्रम जाहीर केला आहे. १३ ऑक्टोबर २०२५ रोजी जिल्हाधिकारी कार्यालयात गटांचे आणि तहसील कार्यालयांमध्ये गणांचे आरक्षण जाहीर होणार आहे. यामुळे निवडणूक प्रक्रियेला गती मिळणार असून, दिवाळीनंतर निवडणुकीचा बिगुल वाजण्याची शक्यता आहे.

निवडणूक तयारीला गती

गेल्या महिन्यात जि.प. अध्यक्षपदाचे आरक्षण सर्वसाधारण प्रवर्गासाठी जाहीर झाले आहे. जिल्ह्यातील १५ पंचायत समित्यांच्या सभापतींच्या आरक्षणाचा निर्णय ९ ऑक्टोबर रोजी होणार आहे. गट आणि गणांच्या आरक्षण सोडतीमुळे निवडणुकीच्या तयारीला आणखी गती मिळाली आहे.

रावेर लोकसभेत गट राखीव, अनेकांचा पत्ता कट

नव्या आरक्षण पद्धतीमुळे रावेर लोकसभा मतदारसंघातील रावेर, यावल, चोपडा आणि मुक्ताईनगर तालुक्यांतील अनेक गट राखीव होण्याची शक्यता आहे. अनुसूचित जाती (एससी) आणि अनुसूचित जमाती (एसटी) यांच्या लोकसंख्येच्या उतरत्या क्रमाने आरक्षण ठरेल, त्यामुळे रावेर मतदारसंघातील अनेक गट राखीव होऊ शकतात. याचा परिणाम म्हणून अनेक विद्यमान सदस्यांचा निवडणूक लढवण्याचा मार्ग बंद होण्याची शक्यता आहे. दुसरीकडे, जळगाव लोकसभा मतदारसंघात नव्या पद्धतीमुळे जुन्या सदस्यांना पुन्हा संधी मिळण्याची आशा आहे, कारण यापूर्वी या भागातील अनेक गट राखीव होत होते.

हरकतींसाठी मुदत

१३ ऑक्टोबर रोजी आरक्षण सोडत जाहीर झाल्यानंतर १४ ते १७ ऑक्टोबरदरम्यान हरकती मागवल्या जातील. यासाठी चार दिवसांची मुदत असेल. जिल्हाधिकारी हरकतींचा गोषवारा आयुक्तांकडे सादर करतील. ३१ ऑक्टोबर रोजी आरक्षण अंतिम होईल आणि ३ नोव्हेंबर रोजी अंतिम आरक्षणाचे राजपत्र प्रसिद्ध होईल.

आरक्षण सोडतीचा कार्यक्रम

६ ऑक्टोबर: अनुसूचित जाती-जमाती आरक्षण निश्चितीचा प्रस्ताव विभागीय आयुक्तांकडे सादर.

८ ऑक्टोबर: प्रस्तावाला मान्यता.

१० ऑक्टोबर: आरक्षण सोडतीची सूचना प्रसिद्ध.

१३ ऑक्टोबर: गट आणि गणांचे आरक्षण सोडत.

१४ ऑक्टोबर: प्रारूप आरक्षण अधिसूचना प्रसिद्ध.

१४ ते १७ ऑक्टोबर: आरक्षणांवर हरकती दाखल करण्याची मुदत.

२७ ऑक्टोबर: हरकतींवर गोषवारा सादर.

३१ ऑक्टोबर: प्रारूप आरक्षण अंतिम.

३ नोव्हेंबर: अंतिम आरक्षणाचे राजपत्र प्रसिद्ध.