महा पोलीस न्यूज । चेतन वाणी । जळगावच्या ममुराबाद रोडवरील एल के. फॉर्म येथे परदेशी नागरिकांची ऑनलाइन फसवणूक करणाऱ्या एका हायटेक बनावट कॉल सेंटरचा भांडाफोड झाला आहे. अपर पोलीस अधीक्षक अशोक नखाते यांच्या विशेष पथकाने ही धडक कारवाई केली असून, जागा मालकासह आठ जणांना ताब्यात घेण्यात आले आहे.
अपर पोलीस अधीक्षक अशोक नखाते यांना शनिवार दि.२७ सप्टेंबर या बोगस कॉल सेंटरबद्दल गोपनीय माहिती मिळाली होती. त्यानुसार, त्यांनी तातडीने हालचाली करत आज, रविवार, २८ सप्टेंबर रोजी दुपारी १ वाजण्याच्या सुमारास एल के. फॉर्मवर छापा टाकला.
३१ लॅपटॉपसह कॉल सेंटरचा ‘सेट-अप’ जप्त
पोलिसांनी धाड टाकली असता, या ठिकाणी ३१ लॅपटॉपसह संपूर्ण कॉल सेंटरचा सेट-अप आढळून आला. या टोळीतील लोक स्वतःला ‘अधिकृत एजंट’ भासवत असत आणि डेटा तपासणीच्या किंवा इतर आकर्षक आमिषांच्या बहाण्याने परदेशी नागरिकांना लक्ष्य करून त्यांची फसवणूक करत होते, अशी माहिती प्राथमिक तपासात समोर आली आहे. या छाप्यात पोलिसांनी सध्या उपस्थित असलेल्या आठ जणांना ताब्यात घेतले आहे.
जागा मालकासह ८ जण ताब्यात
फॉर्मचे स्थानिक मालक यांनाही चौकशीसाठी ताब्यात घेतले आहे. ताब्यात घेतलेल्या आरोपींनी कॉल सेंटरमध्ये एकूण २० ते २५ जण काम करत असल्याची कबुली दिली आहे. अटक झालेले बहुतांश आरोपी राज्याबाहेरील रहिवासी असल्याने या टोळीचा फैलाव आंतरराज्यीय स्तरावर असल्याचे स्पष्ट झाले आहे. हे रॅकेटचे जाळे किती मोठे आहे, याचा सखोल तपास पोलीस करत आहेत. कॉल सेंटरमधून जप्त केलेला डेटा आणि उपकरणे यांची कसून तपासणी करून पुढील कायदेशीर कारवाई केली जाणार आहे.
पहा अपर पोलीस अधीक्षक यांची प्रतिक्रिया :
