महा पोलीस न्यूज । चेतन वाणी । जळगाव स्थानिक प्राधिकरण मतदारसंघाच्या विधान परिषद निवडणुकीच्या पार्श्वभूमीवर भारतीय जनता पक्षाच्या नगरसेवकांची महत्त्वपूर्ण बैठक उत्साहपूर्ण वातावरणात पार पडली. महायुतीचे उमेदवार नंदकिशोर महाजन यांच्या प्रचाराचे नियोजन, मतदान प्रक्रिया आणि निवडणुकीसंदर्भातील विविध विषयांवर या बैठकीत सखोल चर्चा करण्यात आली.
बैठकीला आमदार राजुमामा भोळे, आमदार मंगेश चव्हाण, महापौर दीपमाला काळे, भाजप महानगर जिल्हाध्यक्ष दीपक सूर्यवंशी, माजी जिल्हाध्यक्ष चंद्रकांत बाविस्कर, पश्चिम जिल्हाध्यक्ष डॉ. राधेश्याम चौधरी, गटनेते प्रकाश बालाणी, स्थायी समिती सभापती डॉ. चंद्रशेखर पाटील, सभागृह नेते नितीन लढ्ढा, विशाल त्रिपाठी यांच्यासह पक्षाचे नगरसेवक उपस्थित होते.
यावेळी उपस्थित पदाधिकाऱ्यांनी स्थानिक स्वराज्य संस्थांमधील महायुतीची संघटनात्मक ताकद, राज्यातील विकासकामे आणि आगामी निवडणुकीतील पक्षाची भूमिका याविषयी मार्गदर्शन केले. विधान परिषद निवडणुकीत महायुतीच्या उमेदवाराला अधिकाधिक मते मिळवून देण्यासाठी सर्वांनी एकत्रितपणे कार्य करण्याची गरज अधोरेखित करण्यात आली.
बैठकीत मतदान प्रक्रियेशी संबंधित नियम, मत वैध राहण्यासाठी आवश्यक बाबी तसेच निवडणूक आयोगाच्या सूचनांबाबत सविस्तर माहिती देण्यात आली. नगरसेवकांनी उपस्थित केलेल्या प्रश्नांची उत्तरे देत निवडणुकीतील तांत्रिक बाबींवरही मार्गदर्शन करण्यात आले.
महायुतीतील सर्व घटक पक्षांमध्ये प्रभावी समन्वय असल्याचे नमूद करत उपस्थित नेत्यांनी आगामी निवडणुकीत सकारात्मक निकालाची अपेक्षा व्यक्त केली. जिल्ह्यातील स्थानिक स्वराज्य संस्थांमध्ये वाढत असलेला पाठिंबा आणि कार्यकर्त्यांमधील उत्साह लक्षात घेता प्रचार मोहीम अधिक बळकट करण्यावर भर देण्यात आला.
बैठकीच्या शेवटी उपस्थित नगरसेवकांनी पक्षशिस्त, एकजूट आणि विकासाच्या मुद्द्यांवर निवडणूक लढविण्याचा निर्धार व्यक्त केला. महायुतीच्या उमेदवाराच्या विजयासाठी पूर्ण क्षमतेने काम करण्याची ग्वाही देत प्रचारयंत्रणा अधिक प्रभावी करण्याचा संकल्प करण्यात आला.
या बैठकीमुळे नगरसेवकांमध्ये नवउत्साह निर्माण झाला असून आगामी निवडणुकीसाठी पक्ष संघटना अधिक सक्रिय झाल्याचे चित्र पाहायला मिळाले.
