ब्रेकिंग : महायुतीचा फॉर्म्युला ठरला, ७५ पैकी ६५ जागा जिंकण्याचा विश्वास : मंत्री गिरीश महाजन
महा पोलीस न्यूज । चेतन वाणी । जळगाव महानगरपालिका निवडणुकीत भाजप–शिवसेना–राष्ट्रवादी काँग्रेस यांची महायुती निश्चित होणार असून, ७५ पैकी तब्बल ६५ जागा महायुतीच्या ताब्यात येतील, असा ठाम विश्वास संकटमोचक मंत्री तथा भाजपचे ज्येष्ठ नेते गिरीश महाजन यांनी व्यक्त केला. आज जळगाव येथे पत्रकारांशी बोलताना त्यांनी ही माहिती दिली.
प्रसंगी भाजप आ.मंगेश चव्हाण, आ.राजुमामा भोळे उपस्थित होते. मंत्री महाजन म्हणाले की, शिवसेनेसह जागावाटपाबाबतची चर्चा अंतिम टप्प्यात असून, राष्ट्रवादी काँग्रेससोबत अजून बोलणी बाकी आहेत. उद्या मंत्री गुलाबराव पाटील यांच्यासोबत सविस्तर चर्चा होणार असून, दुपारी १२ वाजेपर्यंत सर्व चित्र स्पष्ट होईल. अंतिम निर्णय आणि अधिकृत घोषणा उद्याच केली जाणार आहे.
गेल्या मनपा निवडणुकीत भाजपचे ५७ नगरसेवक तर शिवसेनेचे १८ नगरसेवक निवडून आले होते. यंदा मात्र दोन्ही पक्ष परस्पर तडजोडीस तयार असून, राष्ट्रवादी काँग्रेसला ५ ते ८ जागा देण्यावर प्राथमिक चर्चा सुरू असल्याचे मंत्री महाजन यांनी स्पष्ट केले. महायुतीचा फॉर्म्युला ठरवताना जिंकण्याची क्षमता, स्थानिक परिस्थिती आणि संघटनात्मक ताकद या निकषांवर निर्णय घेतला जाईल, असेही त्यांनी सांगितले.
महायुतीमुळे काही कार्यकर्ते नाराज होण्याची शक्यता नाकारता येत नाही; मात्र योग्य वेळी सर्वांचे पुनर्वसन केले जाईल आणि प्रत्येकाला संधी दिली जाईल, असा दिलासाही त्यांनी दिला. पक्षासाठी प्रामाणिकपणे काम करणाऱ्या कार्यकर्त्यांवर अन्याय होणार नाही, असेही ते म्हणाले.
दरम्यान, गेल्या पंचवार्षिक निवडणुकीत भाजपकडून निवडून आलेले, मात्र नंतर बंडखोरी करून शिवसेनेत गेलेल्या नगरसेवकांना उमेदवारी देऊ नये, असा भाजपचा स्पष्ट आग्रह असल्याचे मंत्री महाजन यांनी ठामपणे सांगितले. पक्षाशी गद्दारी करणाऱ्यांना पुन्हा संधी देण्याबाबत भाजपाची भूमिका कठोर असल्याचे संकेत त्यांनी दिले.
जळगाव महानगरपालिका निवडणूक येत्या १५ जानेवारी रोजी होणार आहे. या निवडणुकीसाठी भाजपकडून तब्बल ६०० इच्छूक उमेदवारांनी मुलाखती दिल्या असून, उमेदवारीसाठी मोठी चुरस पाहायला मिळत आहे. महायुतीचा अंतिम निर्णय होताच उमेदवारांची नावे जाहीर केली जातील, असेही मंत्री महाजन यांनी स्पष्ट केले.
एकूणच, जळगाव मनपा निवडणुकीत महायुतीच्या माध्यमातून सत्ता मिळवण्याचा भाजपचा आत्मविश्वास उंचावलेला असून, उद्याच्या बैठकीकडे सर्वांचे लक्ष लागले आहे.
