देशासाठी समर्पित जीवन जगणारे कविराज व्यक्तिमत्त्व म्हणजे श्रद्धेय अटलजी – आ. सुरेश भोळे
भाजप कार्यालयात भारतरत्न अटल बिहारी वाजपेयी यांची १०१ वी जयंती साजरी
जळगाव प्रतिनिधी I महा पोलीस न्यूज देशाचे लोकप्रिय माजी पंतप्रधान व भारतरत्न कविराज श्रद्धेय अटल बिहारी वाजपेयी यांची १०१ वी जयंती गुरुवारी (दि. २५ डिसेंबर २०२५) सकाळी १०.३० वाजता भाजप कार्यालय, जी.एम. फाउंडेशन येथे उत्साहात साजरी करण्यात आली. यावेळी शहराचे लोकप्रिय आमदार सुरेश भोळे (राजूमामा) व महानगर जिल्हाध्यक्ष दीपक सूर्यवंशी यांच्या हस्ते अटलजींच्या प्रतिमेचे पूजन व माल्यार्पण करण्यात आले.
याप्रसंगी बोलताना आमदार सुरेश भोळे यांनी श्रद्धेय अटल बिहारी वाजपेयी यांच्या जीवनकार्याचा आढावा घेतला. देशासाठी समर्पित जीवन जगणारे, कवीहृदयाचे, दूरदृष्टीचे नेतृत्व म्हणजे अटलजी असल्याचे त्यांनी सांगितले. अटलजींच्या विचारांवर चालत देश प्रगतीच्या मार्गावर वाटचाल करीत असल्याचेही त्यांनी नमूद केले.
या कार्यक्रमास जिल्हा सरचिटणीस विशाल त्रिपाठी, नितीन इंगळे, राहुल वाघ, जयेश भावसार, ज्येष्ठ पदाधिकारी उदयजी भालेराव, भगत बालाणी, मुकुंद मेटकर, महिला जिल्हाध्यक्ष सौ. नितूताई परदेशी, युवा मोर्चा अध्यक्ष महेश पाटील यांच्यासह भाजपचे अनेक पदाधिकारी उपस्थित होते.
कार्यक्रमादरम्यान भाजप पदाधिकारी संजय घुगे यांनी अटलजींच्या जीवनावर आधारित कविता सादर करून उपस्थितांची मने जिंकली. यानंतर व्यापार आघाडीचे जिल्हाध्यक्ष विनय बाहेती लिखित ‘मोदी फिल्ड भारत’ या पुस्तकाचे विमोचन आमदार सुरेश भोळे यांच्या हस्ते करण्यात आले.
या कार्यक्रमाला भाजपचे जिल्हा पदाधिकारी, मंडल अध्यक्ष, विविध मोर्चा व आघाडीचे पदाधिकारी तसेच कार्यकर्ते मोठ्या संख्येने उपस्थित होते. कार्यक्रमाचे सूत्रसंचालन सरचिटणीस जयेश भावसार यांनी केले, तर आभार प्रदर्शन मुकुंद मेटकर यांनी केले.
