जळगाव शहरातील रथ चौक परिसरात बुधवारी मध्यरात्री मोठी दुर्घटना
युवासेनेतर्फे स्ट्रक्चरल ऑडिट करण्याची मागणी
जळगाव शहरातील रथ चौक परिसरात दोन वर्षांपूर्वी अंशतः पाडण्यात आलेल्या जीर्ण इमारतीचा उर्वरित भाग बुधवार दिनांक १ जुलै २०२६ रोजी पहाटे अचानक कोसळल्याने खाली उभ्या असलेल्या चारचाकी वाहनाचे मोठे नुकसान झाले आहे. सुदैवाने या घटनेत कोणतीही जीवितहानी झाली नाही. मात्र परिसरातील आणखी एका जीर्ण इमारतीलाही मोठे तडे गेल्याने नागरिकांमध्ये भीतीचे वातावरण निर्माण झाले आहे. स्थानिक नागरिकांनी महापालिका प्रशासनाकडे वारंवार तक्रारी करूनही कोणतीही ठोस कारवाई करण्यात आली नसल्याचा आरोप करण्यात येत आहे.
या घटनेनंतर संतप्त नागरिकांच्या भावना लक्षात घेता युवासेनेतर्फे प्रशासनाविरोधात नाराजी व्यक्त करत तात्काळ कारवाईची मागणी करण्यात आली आहे.
या विषयी योग्य त्या उपायोजना व स्ट्रक्चरल ऑडिट करण्याचे निवेदन युवासेना तर्फे जळगाव शहर महानगरपालिकेच्या आयुक्त आदित्य जिवने यांना देण्यात आले. आयुक्तांनी तात्काळ कार्यवाही करण्याचे आश्वासन दिले.
या वेळी युवासेना विभागीय सचिव विराज कावडीया, विधानसभा युवाधिकारी अमित जगताप, महानगर युवाधिकारी प्रीतम शिंदे, अजय खैरनार आदी युवासेना पदाधिकारी उपस्थित होते.
