अमळनेर कृषी उत्पन्न बाजार समितीत जिल्हाधिकाऱ्यांची पाहणी
अतिवृष्टीमुळे धान्याच्या नुकसानीचा घेतला आढावा; व्यापारी व शेतकऱ्यांशी साधला संवाद
अमळनेर | प्रतिनिधी
अतिवृष्टीमुळे झालेल्या नुकसानीच्या पार्श्वभूमीवर जिल्हाधिकारी यांनी अमळनेर तालुक्यातील कृषी उत्पन्न बाजार समितीला भेट देऊन धान्याच्या नुकसानीची प्रत्यक्ष पाहणी केली. बाजार समिती परिसरात साठवून ठेवलेल्या धान्याचे पावसामुळे झालेले नुकसान, त्याचा व्यापारी व शेतकरी वर्गावर झालेला परिणाम तसेच आवश्यक उपाययोजनांचा सविस्तर आढावा यावेळी घेण्यात आला.
मुसळधार पावसामुळे बाजार समितीतील धान्य साठ्याचे नुकसान झाल्याच्या पार्श्वभूमीवर जिल्हाधिकाऱ्यांनी संबंधित अधिकाऱ्यांना तातडीने परिस्थितीचा आढावा घेऊन नुकसानग्रस्तांना आवश्यक ती मदत उपलब्ध करून देण्याबाबत सूचना दिल्या. तसेच भविष्यात अशा प्रकारची हानी टाळण्यासाठी योग्य नियोजन व प्रतिबंधात्मक उपाययोजना करण्याचे निर्देशही देण्यात आले.
यावेळी जिल्हाधिकाऱ्यांनी व्यापारी व शेतकरी यांच्याशी संवाद साधत त्यांच्या अडचणी जाणून घेतल्या. पावसामुळे झालेल्या नुकसानीची माहिती घेत संबंधित यंत्रणांना आवश्यक ती कार्यवाही करण्याचे निर्देश दिले.
पाहणीदरम्यान तहसीलदार, अमळनेर, कृषी उत्पन्न बाजार समितीचे पदाधिकारी, व्यापारी, शेतकरी तसेच संबंधित विभागांचे अधिकारी उपस्थित होते.
