महा पोलीस न्यूज । चेतन वाणी । जळगाव जिल्ह्यात आज सकाळी सुमारे ९.१५ वाजेच्या सुमारास भूकंपाचे धक्के जाणवल्याने नागरिकांमध्ये भीतीचे वातावरण निर्माण झाले. रावेर, भुसावळ, वरणगाव तालुक्यासह जळगाव शहरातही हे धक्के जाणवले. दरम्यान, जिल्हाधिकारी रोहन घुगे यांनीही भूकंपाचे धक्के जाणवल्याच्या वृत्ताला दुजोरा दिला आहे.
मिळालेल्या माहितीनुसार, आज सकाळी अचानक घरांना हादरे जाणवू लागल्याने नागरिकांमध्ये घबराट पसरली. जवळपास अर्धा मिनिट हा प्रकार सुरू असल्याचे नागरिकांकडून सांगण्यात येत आहे. अचानक जाणवलेल्या या धक्क्यांमुळे अनेक नागरिकांनी भीतीपोटी घराबाहेर धाव घेतली.
प्रामुख्याने भुसावळ आणि वरणगाव परिसरात भूकंपाचे धक्के अधिक तीव्रतेने जाणवल्याचे समजते. याशिवाय रावेर परिसरासह जळगाव शहरातील काही भागांतही नागरिकांना हादरे जाणवले.
जिल्हाधिकाऱ्यांकडून दुजोरा
या घटनेबाबत जिल्हाधिकारी रोहन घुगे यांनी भूकंपाचे धक्के जाणवल्याच्या वृत्ताला दुजोरा दिला आहे. त्यामुळे जिल्ह्यात जाणवलेल्या हादऱ्यांच्या वृत्ताला अधिकृत पुष्टी मिळाली आहे. मात्र, भूकंपाची नेमकी तीव्रता, केंद्रबिंदू आणि इतर तांत्रिक तपशील अद्याप समोर आलेले नाहीत.
दरम्यान, धक्के जाणवल्यानंतर नागरिक एकमेकांना फोन करून याबाबत विचारणा करत असून नेमके काय घडले, याबाबत चर्चा सुरू आहे. प्रशासनाकडून पुढील अधिकृत माहितीची प्रतीक्षा आहे.
