महा पोलीस न्यूज । चेतन वाणी । महाराष्ट्र राज्य पोलीस दलात प्रशासकीय पातळीवर एक मोठा निर्णय घेण्यात आला आहे. राज्य पोलीस मुख्यालयाकडून जारी करण्यात आलेल्या ताज्या अधिकृत आदेशानुसार, पोलीस दलातील शेकडो निःशस्त्र पोलीस उपनिरीक्षकांना (PSI) ‘निःशस्त्र सहायक पोलीस निरीक्षक’ (API) पदावर पदोन्नती देण्यात आली आहे. पोलीस महासंचालक कार्यालयाने १९ मे २०२६ रोजी हा महत्त्वपूर्ण आदेश जारी केला.
सेवाज्येष्ठतेनुसार पदोन्नतीचा मार्ग मोकळा
सामान्य प्रशासन विभागाच्या शासन निर्णयातील तरतुदींनुसार, पदोन्नतीच्या कोट्यातील रिक्त पदे सेवाज्येष्ठतेच्या आधारे भरण्यात आली आहेत. यामध्ये २५ मे २००४ नंतर शासन सेवेत रुजू झालेल्या निःशस्त्र पोलीस उपनिरीक्षकांना त्यांच्या मूळ सेवाज्येष्ठतेनुसार सहायक पोलीस निरीक्षक पदावर बढती देण्यात आली आहे. विभागीय पदोन्नती समितीने (DPC) पात्रता तपासून सन २०२४-२५ ची निवडसूची तयार केली होती.
४८८ पोलीस अधिकाऱ्यांना नवीन पदस्थापना
यापूर्वी जुलै २०२५ मध्ये झालेल्या आदेशान्वये ३४१ अधिकाऱ्यांना पदोन्नती देण्यात आली होती. त्यानंतर निवडसूचीवरील मोहोरबंद लखोट्यातील प्रकरणांचे पुनर्विलोकन करण्यात आले. या पुनर्विलोकनाअंती पात्र ठरलेल्या एकूण ४८८ निःशस्त्र पोलीस उपनिरीक्षकांना आता सहायक पोलीस निरीक्षक पदावर पदोन्नती देऊन त्यांचे नवीन महसूल संवर्ग व घटकानुसार वाटप करण्यात आले आहे.
पोलीस आस्थापना मंडळाची मंजुरी
महाराष्ट्र पोलीस अधिनियम, १९५१ मधील कलम-२२ न नुसार पोलीस आस्थापना मंडळ क्रमांक २ ला प्रदान असलेल्या अधिकारांचा वापर करून या बदल्या व पदोन्नतींना मंजुरी देण्यात आली आहे. पदोन्नती मिळालेल्या सर्व अधिकाऱ्यांना त्यांनी कार्यभार ग्रहण केल्याच्या दिनांकापासून नवीन पदावरील नियुक्ती लागू होणार आहे.
या मोठ्या पदोन्नतीमुळे राज्यातील कायदा व सुव्यवस्था अधिक मजबूत होण्यास मदत होणार असून, पोलीस दलातील रिक्त पदांचा प्रश्न सुटण्यास मोठी मदत होणार आहे. सर्व संबंधित अधिकाऱ्यांना तात्काळ नवीन ठिकाणी रुजू होण्याचे आदेश देण्यात आले आहेत.
